ZIMBABWE | Uitsettings maak óór grense skade

Die Mugabe-regering se hernieude vlaag plaasuitsettings, saam met die kansellasie van permitte wat Zimbabwiërs toelaat om in Suid-Afrika te werk, kan ’n uiters nadelige uitwerking op die streek hê, waarsku mnr. Bennie van Zyl, hoofbestuurder van die TLU SA.

Dit kom ná die Zanu-PF-regering van pres. Robert Mugabe die afgelope week minstens 38 boere van hul plase afgesit het.

“Toestroming na Suid-Afrika is sekerlik ’n groot moontlikheid. Sonder werkspermitte lei dit weer tot meer misdaad en ontwrigting. Daar is duidelik geen begrip van hoe ’n ekonomie werk nie óf dit word ondergeskik gestel aan ’n beheptheid met ’n ideologie. Daar gaan net nóg vinniger nóg groter armoede geskep word.”

Hy sê met dié dat die Zimbabwe-werkpermitte in Suid-Afrika nou gekeer word, gaan dit die druk nog groter maak.

Mnr. Omri van Zyl, uitvoerende direkteur van Agri SA, sê met grondhervorming en voedselsekerheid is dit van deurslaggewende belang dat grond as sekuriteit vir finansiering kan dien.

“Grond op sigself beteken nie veel as daar nie geld daarin belê word nie. Al word die laaste hektaar grond aan jeugdiges gegee, sal daar nie vooruitgang met produksie wees nie omdat die ekonomiese basis vir produksie en waardekettingbestuur nie gereed is nie.” Van Zyl sê hy hoop nugtere denke sal in Suid-Afrika seëvier.