Leer dié lesse by Knysna
Die Tuinroete is onlangs op sy knieë gedwing deur verwoestende brande. Meer as 500 huise het afgebrand en duisende mense is ontwortel. Maak seker jou versekering en papierwerk is in orde vir ingeval só ’n ramp jou tref.
Indien jy een ding uit jou huis kon red in geval van ’n brand, wat sal dit wees?
Baie van ons het al dié vraag gevra. Vir die inwoners van Knysna en omstreke was dit egter nie eens ’n opsie nie, want die brande het net te vinnig gekom.
Met almal langs die Tuinroete wat nou hul lewens moet herbou, gaan ons harte uit na die naasbestaandes van dié wat hul lewe verloor het en ons is saam stomgeslaan met dié wat alles verloor het.
Met miljarde rande se skade, moet ons vra of ons iets uit dié tragedie kan leer.
Niks is so verwoestend soos ’n natuurramp nie, en niks gebeur so vinnig nie.
Ooggetuies vertel hoe die vuur binne sekondes oor paaie en selfs oor die monding van die meer gespring het om op sy verwoestende pad voort te beur.
Sommige huishoudings moes tot vyf keer ontruim word omdat die huis waarin hulle skuiling gesoek het, skielik in die pad van die brand was.
Dán leer jy geen bate is soveel werd soos jou en jou gesin se lewens nie. Wanneer iemand jou weer vra wat jy in ’n brand sal red, is die antwoord: My gesin.
DOKUMENTE
Wanneer alles in ’n brand vernietig word, moet bankkaarte, paspoorte en identiteitsdokumente vervang word. Dit kan egter net gedoen word met ’n bewys van wie jy is. Maak dus seker jy bêre iewers weg van jou huis af gewaarmerkte afskrifte van jou dokumentasie, waaronder geboortesertifikate en huweliksdokumente. Die “kuberwolk” is ook ’n goeie bêreplek. Daar is ook persoonlike herinneringe. Laat jou kinders hierdie skoolvakansie al die familiefoto’s wat oor die jare geneem is, oplaai en ook in die “wolk” bêre. Onthou, jou rekenaar se hardeskyf is nie goed genoeg nie, want in die geval van ’n brand of diefstal word dit ook vernietig.
KONTANT IN DIE HAND
’n Noodfonds was nog altyd deel van ’n goeie aftreeplan, maar dit word selde vir werkende mense voorgestel. As jy skielik sonder kos en klere gelaat word, is volgende maand se salaristjek verskriklik ver.
’n Noodfonds gelyk aan drie maande se salaris kan in sulke gevalle van onskatbare waarde wees. Maar dit kan net so belangrik wees in normale omstandighede as die motor skielik breek of iemand ná ’n ongeluk in die hospitaal opgeneem moet word. Begin dus nou met daardie fonds.
VERSEKERING
Die ekonomie lyk sleg en bitter min dui daarop dat dit binnekort gaan beter word. In sulke omstandighede moet elke sent omgedraai word, en versekering bly dikwels in die slag. Ongelukkig is dit die verkeerde plek om te begin bespaar. Wanneer geld skraps is, kan enige verlies jou finansiële verknorsing in ’n katastrofe laat verander. Talle van die slagoffers het vertel hulle moes onlangs hul versekering kanselleer, en vir hulle lyk die toekoms nou die donkerste.
BARMHARTIGHEID
Ons het die afgelope paar maande deurgaans gehoor hoe baie ons as Suid-Afrikaners van mekaar verskil en baie partye het haat aangewakker. Die wyse waarop die hele Suid-Afrika saamgestaan het om hulp te verleen, wys egter weer die ware hart van die land.
Terwyl vlugte vol brandweermanne uit Johannesburg vertrek het, is noodvoorraad van oral ingevlieg. Miljoene rande is deur groot versekeraars en ander maatskappye geskenk.
’n Groep studente op Potch het geld vir Bybels ingesamel en gestuur. Daar is nie vrae gevra nie, en bepaalde lojaliteite aan politieke partye was irrelevant. Dit was eenvoudig: Mense was in nood. Onder die oppervlakte van mense in Suid-Afrika is ’n oorweldigende naasteliefde. Ek het na my mede-Suid-Afrikaners gekyk en was trots. Dit maak nie saak wat die toekoms na ons kant toe gooi nie, ek weet daar is hoop vir Suid-Afrika.