Kragtoer ná verspoelde lande
As jy lank kon stilstaan, sou jy sommer hóór hoe die mielies op mnre. Anton en Alfred Nebe se plaas buite Potchefstroom groei. Landbouweekblad het gaan kyk hoe twee wit mieliebasters by die Nebe-boerdery gepresteer ondanks groot reën wat lande oorspoel he
Hoewel te veel reën op een slag geval het, het hulle ’n goeie seisoen beleef, sê mnr. Alfred Nebe, wat saam met sy pa, Anton, die Nebe-boerdery buite Potchefstroom bedryf.
“In die eerste deel van die seisoen het ons op een slag 150 mm en op ’n ander keer 110 mm reën gekry. Ons het loging op die lande ervaar en ook ’n bietjie hael. Nogtans het PAN 5R-791BR homself in moeilike tye bewys. Hy is ’n sterk groeier en het in die regte stadium in die saad gekom, goed bestuif en die koppe is vól.”
Anton is net so beïndruk met Pannar se witmieliepakket. “Die mielies was onder water en toe die water sak, het dié lande soos ’n plat sandveld gelyk. Selfs dít kon die jong mielieplantjies nie onderkry nie en die meeste het deurgedruk.”
Alfred het PAN 5R-791BR teen 32 000 plante per hektaar aangeplant en uiteindelik 9,4 ton/ha gestroop.
“Ons het ’n hoë plantestand (rywydte 91 cm) gebruik omdat ons ’n opbrengs van 10 ton/ha nagejaag het. Ná die baie reën was daar wel ’n bietjie spoelskade op die onderste lande en toe sit ons met ’n plantestand wat nader is aan 28 000 plante per hektaar. As hierdie ’n pieperige mielie was, het ons alles verloor en sou ons oor moes plant,” sê hy.
Die Nebe-boerdery het die afgelope seisoen weer Pannar se wit mielies gekies op grond van goeie prestasie in vorige jare.
Pannar Saad se witmieliepakket vir droëland in die westelike produksiestreek bestaan uit ’n uitstekende reeks mediumvinnige en mediumbasters. Die pakket bied goeie prestasie, aanpasbaarheid en stabiliteit vir goeie risikobestuur.
BG 5785BR EN PAN 5R-791BR
BG 5785BR val in die mediumvinnige groeiklas in die witmieliepakket vir droëland. Hierdie Biogene®-baster het goeie stabiliteit en is sterk meerkoppig. Dit word veral in die westelike produksiegebiede as deel van die hoofaanplanting aanbeveel en is ook goed aangepas vir die oostelike produksiestreek. Die baster is ’n aantreklike planttipe met goeie agronomiese balans en verdraagsaamheid teen kop- en pluimbrand, asook noordelike blaarskroei.
PAN 5R-791BR is nuut op die rak. Dit is ’n enkelstammige, meerkoppige baster.
In hierdie reeks is dit die baster wat die sterkste meerkoppig is, sê mnr. Stephan le Roux, verkoopsverteenwoordiger van Pannar in die Vereeniging- en Potchefstroom-omgewing. Hierdie baster is goed aangepas op sandgronde en word as deel van die hoofaanplanting aanbeveel.
“Ons het goeie dinge van PAN 5R-791BR gehoor en die proefresultate gesien. Stephan het ons van die mielie vertel en die meerkoppigheid was ’n groot faktor. Ek was ook reeds tevrede met die ander Pannar-basters wat ons al gebruik het,” sê Alfred.
Hy voeg by die mielie “wag” vir die regte toestande voordat hy in rat kom.
“Dit is asof die mielie terughou as die toestande nie reg is nie, maar sodra die weer verander en gunstige toestande heers, kom hy vinnig in saad. Daarom sien ons vandag hierdie mooi, vol mieliekoppe,” sê Alfred.
“Ek is nie altyd opgewonde oor nuwe kultivars nie,” sê Anton, “want ek wil eers sien of ’n nuwe mieliebaster homself hier by ons bewys. Vanjaar was ek egter uit die staanspoor baie beïndruk.
“PAN 5R-791BR het sterk wortelontwikkeling getoon en die plante staan hoog en dra goed. Toe dit weens die stortreën moeilik gegaan het, het die mielie nooit rêrig gelyk of hy sukkel nie. Dit lyk of Pannar se navorsing oor dié baster in die kol is.”