PERDE WIL NIE HOOI VREET
Ons het oulandsgras en tef op ons plaas geplant. Verlede jaar se tef het goed verkoop en ons het hooi aan drie perdestalle in die Laeveld voorsien. Vanjaar het dit baie gereën en ons kon eers laat in die land kom om te sny. Ons kon net een laat snysel afkry weens die nat lande. Ons het nou van die drie stalle klagtes gekry dat hul perde koliek kry en nie die gras wil eet nie. Die bale word in ’n droë plek opgeberg en die gras was goed bemes. Ek is raadop en weet nie wat fout is nie. Uit die boer se inligting en uit die laboratoriumresultate kan afleidings gemaak word.
Om goeie hooi te maak, moet die gras in die vroeë blomstadium gesny word. Die hooi word in die sekum (sakderm) van die perd verteer. Goeie hooi is hoog in sellulose en hemisellulose, wat deur die bakterieë in die sekum in vlugtige vetsure omvorm word.
Swak hooi is gras wat gesny is as dit reeds ryp is. Die ryp gras is baie hoog in lignien (houtagtige materiaal), wat onverteerbaar is. Die swak hooi het bykans geen voedingswaarde vir die perd nie. Dit kan tot die impaksie van die kolon (dikderm) en sekum lei, wat dan verder tot koliek kan lei.
Die inligting wat die boer verskaf, bevestig die gras is van ’n lae gehalte, want die gras was laat gesny en reeds fisiologies volwasse. Die laboratoriumuitslae wys ook die gras was ryp. Tef en oulandsgras is tipiese Suid-Afrikaanse hooigewasse. J.W. Groenewald en P.A. Boyazoglu se werk gee die samestelling van goeie tef aan as:
Die laboratoriumuitslae wys die hooi se voedingswaarde is substandaard. Die lae kalium wys ook die hooi was nie blaarryk nie. Die spoorelemente, veral koper en sink, is baie laag.
Hooi wat laat gesny word as die gras eers ryp is, is nie geskik vir perdevoeding nie. Probeer om die hooi in die vroeë blaarstadium te sny. Verder moet gras op lande geplant word waarvan ’n volledige grondontleding gedoen is. Die volgende faktore is noodsaaklik: pH-regstelling deur dolomietiese of kalsitiese kalk NPK (stikstof, fosfaat en kalium) Spoorelemente (spesifiek koper en sink)