BRANDSIEKTE BY HONDE
My foksterriër van een jaar oud het brandsiekte vandat hy gebore is. By die veearts het hy inspuitings gekry en ’n salf en dipmiddel wat ek een keer per maand gebruik. Die brandsiekte kom egter altyd weer terug. Kan so ’n hondjie met brandsiekte genees word? Brandsiekte in honde word veroorsaak deur ’n myt met die naam van Demodex. Die myt
word onder ’n mikroskoop gediagnoseer nadat velskraapsels gemaak is en lyk soos ’n klein krokodil. Die probleem word gereeld in honde jonger as ses maande gediagnoseer en kan baie moeilik wees om te behandel.
Die myte veroorsaak die verlies van hare in klein kolletjies en die hondjies krap gereeld. ’n Hond kan al die hare op sy lyf verloor weens die mytinfeksie.
Die behandeling vir die siekte is baie intensief. Daar is ’n inspuiting wat elke week vir vier weke gegee moet word. Terselfdertyd is daar ’n salf en sjampoe wat gebruik moet word. Die hond moet minstens elke week gedip word en die salf moet elke dag aangesmeer word.
Die belangrikste aspek van brandsiektebehandeling by honde is dat die behandeling vir minstens vier weke moet voortgaan nadat die simptome opgeklaar het. Dit sal lyk asof ’n mens ’n gesonde hond behandel, maar die myt is baie moelik om dood te maak en daarom is die ekstralang behandeling noodsaaklik.