Kerrievispasteitjies
Hierdie maklike pasteitjies is vinnig en goedkoop om te maak, maar besonder lekker. Maak kleintjies en sit hulle voor met ’n doopsous van jou keuse. Of bak groter pasteie vir middag- of aandete en sit dit voor met kool- en groenslaai.
Broskorsdeeg
750 ml koekmeel 7 ml sout 250 g koue botter, gerasper of in klein blokkies gesny 1 groot eiergeel Yswater
Vulsel
30 ml olyfolie of botter 1 ui, baie fyn gekap 2 knoffelhuisies, fyn gekap 5 ml kerriepoeier 3 blikkies tuna (170 g elk), goed gedreineer 5 ml koekmeel 60 ml melk 60 ml goeie mayonnaise Sout en vars gemaalde swartpeper na smaak 5 ml fyngekapte, vars pietersielie Vars fyngerasperde suurlemoenskil en suurlemoensap na smaak 1 eier, geklits
Deeg: Pols die meel, sout en botter saam in ’n voedselverwerker tot krummelrig (of vryf die botter met jou vingerpunte by die meel en sout in). Voeg die eiergeel en ’n paar druppels yswater by tot daar klam frummels vorm wat aan mekaar begin vassit. Keer die mengsel uit op ’n werksoppervlak en druk bymekaar in ’n plat skyf deeg. Draai toe in kleefplastiek en verkoel vir ten minste 30 minute.
Vulsel: Verhit die olie of botter in ’n pan en braai die ui daarin tot sag. Voeg die knoffel en kerriepoeier by en braai tot geurig. Voeg die tuna by en braai tot deurwarm. Sprinkel die koekmeel oor en braai vir ongeveer 1 minuut. Voeg die melk by en verhit tot kookpunt terwyl jy deurentyd roer. Verwyder van die hitte en roer die mayonnaise by. Geur na smaak met sout en vars gemaalde swartpeper. Roer die pietersielie by en voeg ’n klein bietjie suurlemoenskil en -sap na smaak by. Laat die vulsel afkoel tot kamertemperatuur.
Voorverhit die oond tot 190 °C en voer ’n paar bakplate met bakpapier uit. Spuit liggies met kleefwerende kossproei. Rol die deeg dun uit op ’n meelbestrooide oppervlak en sny sirkels daaruit. Skep van die tunavulsel op elke deegsirkel. Vou die deeg toe oor die vulsel om halfmaanpasteitjies te maak en verseël die rante met ’n vurk. Pak die pasteitjies op die voorbereide bakplaat, bestryk liggies met geklitste eier en bak vir ongeveer 15-20 minute, tot goudbruin en gaar. Lewer 24 pasteitjies.