Beesvleispastei met groente

Maaskaasdeeg

500 ml koekmeel 2 ml bakpoeier 4mlsout 240 g geroomde maaskaas 250 g botter 1 eier, om oor te verf

Vulsel

30 ml kookolie 30 ml botter 1,5 kg beesvleisblokkies 750 ml beesvleisaftreksel 1 ui, gekap 10 ml fyngekapte, vars tiemie 5 ml fyngekapte, vars roosmaryn 30 ml worcestersous 45 ml port 500 ml bevrore groente Sout en swartpeper na smaak

Vir die deeg: Sif die droë bestanddele saam. Sny die maaskaas en botter met ’n mes by die meelmengsel in of gebruik ’n voedselverwerker. Meng tot ’n sagte deeg. Bedek met kleefplastiek en hou in die yskas tot nodig.

Vir die vulsel: Verhit die olie en botter in ’n groterige, vlak pan. Braai die vleis bietjiesgewys tot goudbruin. Skep die vleis in ’n groot kastrol. Voeg die aftreksel, ui, kruie en geurmiddels by. Bedek en laat prut sowat ’n uur en 45 minute tot sag. (Voeg kookwater by as die sous te dik begin word.) Voeg die groente by, verhit weer tot kookpunt en prut vir 2 minute. Laat die vulsel afkoel tot kamertemperatuur en verkoel verder tot benodig.

Om saam te stel: Voorverhit die oond tot 200 °C. Skep die vulsel in ’n voorbereide pasteibak. Rol die deeg uit op ’n meelbestrooide oppervlak. Bedek die vulsel met die deeg en bestryk met die eier. Bak vir 30 minute of tot die deeg goudbruin en die vulsel borrelend is. Lewer 6-8 porsies.