NUWE KOOLKULTIVARS BIED WEERSTAND TEEN SWARTVROT

Twee nuwe koolkultivars is in die afgelope twee jaar deur die saadmaatskappy Hygrotech bekend gestel. Dié kultivars bied talle moontlikhede vanweë hul weerstand teen swartvrot. Hulle lewer groot koppe van tot 5,5 kg, sê mnr. Hugo Burger, tegniese bestuurder van dié maatskappy vir die Wes-, Oos- en Noord-Kaap, asook Namibië.

Die kultivars Karabo en Livia bied albei goeie weerstand teen swartvrot, waarskynlik die belangrikste siekte wat koolplante teister. Karabo lewer koppe van gemiddeld 4,5 kg tot 5,5 kg. Die koppe van Livia weeg 4 kg tot 5 kg – groottes wat gewild onder verbruikers is. Karabo kan die hele jaar geplant word, terwyl Livia in die winter, herfs en lente floreer wanneer dit koeler is.

Nuwe kultivars word voortdurend geëvalueer, maar ou staatmakerkultivars, soos Star3301, Granslam, Megaton en Empowa, word steeds landwyd aangeplant.

Tans is landwyd sowat 3 500 ha onder kool, waarvan sowat 600 ha in die Wes-Kaap. KwaZulu-Natal en die Oos-Kaap is die land se belangrikste koolproduksiegebiede, hoewel baie kool nou ook in Gauteng geplant word.

Koolaanplantings neem toe in Namibië, waar minstens 300 ha in die jongste jare gevestig is. Die meeste aanplantings kom voor by Rundu, Oshivello en Ruacana in die noorde en by Stampriet in die suide.