VERTIKALE BOERDERY: VOORSTE TEGNOLOGIE SKORT

Vertikale boerdery, ’n vorm van hidroponika, is plaaslik nog nie op die vlak wat dit elders ter wêreld is nie, want die produktiwiteit daarvan is tans nie noemenswaardig beter as dié van horisontale hidroponikastelsels nie.

Die Suid-Afrikaanse hidroponikabedryf is steeds in sy kinderskoene. Daarom word die voorste tegnologie nog nie plaaslik toegepas nie, sê mnr. Damian Clayton, eienaar van Grow Guru in Port Elizabeth. “Dit dwing hidroponikaboere om nuwe planne te beraam om hul huidige stelsels so doeltreffend moontlik te maak.

“Die hidroponikabedryf groei egter eksponensieel in Suid-Afrika omdat dit in ’n groot mate die onvoorspelbaarheid van die weer uit die weg ruim en omdat dit water doeltreffender benut. Die hoop is dat tegnologie bekostigbaarder word en dat die plaaslike ekonomie herstel sodat die mark vir die duurder nis-groentes, wat baie doeltreffend met hidroponikastelsels verbou kan word, kan vergroot. Die oprigitingskoste van ’n ordentlike hidroponikastelsel is egter steeds ’n groot struikelblok om tot die bedryf toe te tree.

“Die nuwe bedrywe, soos witlof, wat die lig sien en die vooruitsig dat die hennepbedryf op dreef kan kom, is egter baie goeie nuus. Dit behoort die hidroponikabedryf ’n groot hupstoot te gee,” sê Clayton.