WÊRELD SE APTYT VIR HERNIEUBARE ENERGIE NOG LANK NIE OP
Die wêreldwye neiging om weg te beweeg van fossielbrandstowwe na hernieubare energie om elektrisiteit, verhitting en verkoeling, asook vervoer te verskaf, neem toe. Vanjaar se uitgawe van die REN21 Renewables Global Status Report wys daarop dat ’n rekordgetal nuwe hernieubare-energiestelsels wêreldwyd opgerig is. Dit gaan gepaard met ’n daling in internasionale energiepryse en ’n ontkoppeling van ekonomiese groei en energie-gebaseerde koolstofdioksiedvrystellings.
Die verslag wys daarop dat die pryse van fossielbrandstowwe, soos steenkool, verlede jaar laag gebly het, terwyl die pryse van ’n aantal hernieubare-energietegnologieë, soos sonkrag en windkrag, drasties gedaal het. Luidens die verslaghetdiewêreldseenergiebehoeftesedert 2011 teen ’n jaarlikse gemiddelde koers van 1,8% bly groei. Die primêre groei in die vraag na energie het grootliks in ontwikkelende ekonomieë plaasgevind, terwyl ontwikkelde lande se vraag verlangsaam of selfs gedaal het.
Wêreldwye energie-verwante vrystelling van koolstofdioksied weens fossielbrandstowwe het die afgelope drie jaar met slegs 0,2% toegeneem, wat ’n bewys is van die internasionale neiging om weg te beweeg van fossielbrandstowwe om energie te verskaf, maar ook wys dat kragopwekking deur hernieubare-energiebronne besig is om toe te neem. Hernieubare energie verskaf sedert 2015 sowat 19,3% van die wêreld se finale energieverbruik. Daarvan dra biomassa, wat hoofsaaklik vir kookdoeleindes en verhitting in plattelandse gebiede gebruik word, sowat 9,1% by, terwyl moderne hernieubare tegnologie se aandeel tot 10,2% toegeneem het.