Dink nuut oor waterbestuur
Die Water Infra-groep van Kroonstad in die Vrystaat is al 53 jaar lank betrokke by die ontwikkeling en ontwerp van vernuwende reservoirs vir die opberg van water.
Die Water Infra-groep het drie hoofontwerpe vir reservoirs, naamlik die Erichsen betonpaneelreservoir, die Circa Flow ZINC-AL reservoir en die INFRA-STAAL swaardiensreservoir. Die reservoirs dek ’n verskeidenheid markte en sektore.
In die vroeë 1960’s het mnr. S.P.G. Erichsen die behoefte aan ’n alternatiewe en doeltreffender damboumetode, hoofsaaklik in die landbousektor, geïdentifiseer. Hy het toe die voorafvervaardigde Erichsen betonpaneelreservoir ontwerp en gepatenteer.
Dié ontwerp is deur die jare deur duisende boere as die doeltreffendste oplossing vir hul probleme met die opgaar van water verkies. Die patent het ook die British Engineering Standard se toekenning verwerf as die eerste suksesvolle voorafvervaardigde betonpaneelstelsel ter wêreld om water mee op te gaar.
DUURSAAMHEID
Verdere ontwikkeling van die ontwerp deur mnr. Theuns Welgemoed het daartoe gelei dat die Erichsen reservoir met ’n vloeistofhoudende volume van tot drie megaliter gebou kan word. Deur die verhoogde houvermoë van die Erichsen reservoir is die toepassingsveld verbreed en skryf ingenieurs landwyd dit die meeste voor as gespesifiseerde reservoir.
Met veranderende ekonomiese toestande in Suid-Afrika is die behoefte geïdentifiseer vir kostedoeltreffender metodes om water op te gaar en te beheer.
Gehalte en duursaamheid in verhouding met die koste van reservoirs speel ’n groot rol.
Theuns en sy seuns Dewet en Erichsen, het twee nuwe unieke en kostedoeltreffende reservoirstelsels ontwerp, naamlik die Circa-Flow ZINC-AL reservoir, asook die INFRA-STAAL swaardiensreservoir.
Deur voortdurend die behoeftes van die wateropgaarbedryf te bestudeer en navorsing te doen oor nuwe en doeltreffender materiale, verseker dit dat hierdie groep aan die voorpunt
van die wateropgaar en -bestuurbedryf bly.
Die ontwerp van die ZINCAL en INFRA-STAAL hoëdiensreservoirs is onderworpe aan streng ingenieurstandaarde.
Die Water Infra-groep voeg ook bykomende veiligheidsmeganismes by hul ontwerpe om te verseker hul kliënte kry ’n reservoirstelsel van hoogstaande gehalte en ontwerp.
Die Circa-Flow ZINC-AL reservoir het ’n ligte struktuur. Dit is vooraf vervaardig in ’n gespesialiseerde fabriek waar streng beheer oor gehalte en akkuraatheid toegepas word. Dit bestaan uit ZINC-AL golfplate met ’n hoë treksterkte wat strukturele krag aan die struktuur verskaf en aan SABS-stanvan daarde voldoen.
Die gewildheid hierdie reservoirstelsel, veral in die landboubedryf, is nie net danksy kostedoeltreffendheid nie, maar minimale terreinvoorbereiding is daarvoor nodig. Die houvermoë van die Circa-Flow ZINC-AL reservoirs wissel van 18 kℓ tot330k ℓ en word in verskillende dieptes vervaardig.
Die ZINC-AL reservoir is beskikbaar as ’n doen-dit-selfstelsel, met ’n voorafvervaardigde PVCvoering van 1 000 gram/m².
Groot sukses is behaal met die uitvoer van hierdie stelsel na verskeie Afrikalande, soos Nigerië, Gambië, Namibië en Mosambiek.
Die INFRA-STAAL reservoir se ontwerp verleen aan die ontwerpspan die vermoë om deursnee en dieptes aan te pas sodat dit in die kliënt se spesifieke behoeftes kan voorsien. Die ZINC-AL en INFRA-STAAL reservoirs word albei met die swaardiensvoering CPL 1500 uitgevoer en is nie nét geskik vir die opgaar van water nie, maar ook swaarder vloeistowwe.
Die INFRA-STAAL reservoir is uniek en het ’n vernuwende stelsel wat met ’n houvermoë van tot 3,5 megaliter vervaardig en opgerig kan word.
DEKADES VAN DIENS
Al drie ontwerpe is geskik vir die gebruik van onbehandelde water en kan ook toegemaak word vir drinkbare water.
Die Erichsen, ZINC-AL en INFRA-STAAL reservoirs word algemeen in die Suid-Afrikaanse landbou-, bosbou- en mynboubedryf, asook landwyd by munisipaliteite gebruik.
Deur voortdurende navorsing en ontwikkeling is die Water Infra-groep die leier op die gebied van wateropgaring en -bestuur, waar duursaamheid en kostedoeltreffendheid ’n bepalende faktor in die ekonomiese klimaat is.
Die groep is só geposisioneer om alle markte, van die kleinboer tot megaboer, tot die industriële, mynbou- en munisipale sektor te bedien met gehalteprodukte en voortreflike diens.
Sedert 1964, en nou met bestuurders van die derde geslag, streef die groep steeds daarna om voortdurend gehalteprodukte en diens van die hoogste gehalte aan al hul kliënte, landwyd én internasionaal, te bied.