Polisie trap water oor wapenamnestie
DIE kans dat die polisie nóg ’n amnestietydperk vir die inhandiging van vuurwapens gaan kry, lyk skraal nadat hy nie verlede week in die Parlement kon antwoord of wapens wat in 2010 tydens die vorige amnestietydperk ingehandig is, met enige misdade verbind kon word nie.
Lede van die Parlement se portefeuljekomitee vir polisie was merkbaar geskok toe hulle verneem dat die polisie ondanks die drama van die 2010-amnestietydperk klaarblyklik nie sy taak na wens vervul het nie. Die polisie het ’n voorlegging aan die komitee gedoen oor sy planne om aanstaande jaar weer ’n amnestietydperk te open.
In die amnestietydperk van ses maande in 2005 is 46 631 wettige vuurwapens en 33 823 onwettige wapens vrywillig ingehandig. In die amnestietydperk van drie maande in 2010 is 30 442 wettige vuurwapens vrywillig ingehandig, asook 11 887 onwettige wapens.
Genl. Jaco Bothma, hoof van vuurwapen-, drank- en tweedehandsegoederebeheer by die polisie, het verduidelik dat alle vuurwapens wat ingehandig word, vir ballistiese toetse gestuur word.
Dit is egter moeilik om vuurwapens wat in misdade gebruik is, met spesifieke misdaadvoorvalle te verbind, behalwe wanneer die wapen afgevuur is en patroondoppies op die misdaadtoneel gevind is. Verder vyl misdadigers ook die vuurwapen se reeksnommer af.
“Ja, dit is moontlik dat misdade met heelwat van die vuurwapens (wat tydens die amnestietydperke ingehandig is) gepleeg is, maar vanweë die feit dat ons nie meganismes in werking gehad het nie, kan ons nie verduidelik of die amnestie suksesvol of onsuksesvol was nie.’’
Sulke meganismes sal vir die 2018-amnestietydperk ingestel word.
‘KAN NIE GETUIG’
Dit het dr. Pieter Groenewald, leier van die VF Plus, laat vra of Bothma dus bedoel dat nie een van die vuurwapens wat ingehandig is, aan ’n misdaad verbind kon word nie.
Bothma het geantwoord dat “hy nie kan getuig” dat dit die geval is nie. Sy kollega genl. Nobesuthu Mosiye het egter tot sy redding gekom en geantwoord dat daar wel aantekeninge beskikbaar is van hoeveel vuurwapens met misdade verbind kan word.
Die polisie se doel met die amnestie is om onder meer die aantal onwettige vuurwapens te verminder, vuurwapeneienaars in staat te stel om van ongewenste wapens ontslae te raak en misdaad te voorkom.
–