DIE ANDER SÊ

Drie multinasionale vleismaatskappye – JBS, Cargill and Tyson – het verlede jaar na raming meer kweekhuisgasse vrygestel as die hele Frankryk. Die wêreld se 20 grootste vleis- en suiwelmaatskappye het in 2016 saam meer kweekhuisgasse vrygestel as Duitsland, verreweg die grootste besoedelaar in Europa. As dié maatskappye ’n land was, sou hulle die sewende grootste kweekhuisgasvrysteller ter wêreld gewees het. Dit is volgens die berekeninge van twee navorsers van die instituut vir landbou- en handelsbeleid (IATP) en die nie-regeringsorganisasie GRAIN.

Die navorsers wys daarop dat weinig vleis- en suiwelmaatskappye hul kweekhuisgasvrystelling bereken of publiseer. Oor die afgelope paar dekades het die grootste suiwel- en vleismaatskappye ongelooflik magtig geword en kon hulle beleid bevorder wat die snelle groei van vleis- en suiwelproduksie en -verbruik tot elke prys wêreldwyd aanmoedig. By die eersdaagse COP23-klimaatsvergadering in Bonn, Duitsland, sal dié maatskappye beweer hul produksie is onontbeerlik vir wêreldvoedselsekerheid.

As ons ernstig is oor wêreldvoedselsekerheid én om klimaatsverandering te bestry, moet die wêreld egter dringend belê in ’n oorgang na kosstelsels waarin kleinboere, landbou-ekologie en plaaslike markte ’n sleutelrol speel. Dié stelsels produseer dalk minder, maar herstel grond, verskaf inkomste en lewer gewasse en diere wat weerstandig is teen ’n onvoorspelbare klimaat.