STAMBOEK-STRYD DRAAI WÉÉR IN DIE HOF
SA Stamboek hoop dat die Appèlhof in Bloemfontein binnekort eindelik uitsluitsel oor minstens een van die twispunte in die jare lange regstryd tussen dié organisasie en die Landbounavorsingsraad (LNR) sal gee.
Stamboek se appèl teen ’n vroeëre Hooggeregshof-uitspraak ten gunste van die LNR sou op Donderdag 9 November in die Appèlhof aangehoor word.
Dit sou oor een van drie twispunte handel: Of daar wetlike regverdiging is vir Stamboek en sy lede se weiering om alle registrasie- en prestasiedata onvoorwaardelik na die Intergis by die LNR oor te dra.
Mnr. Freddie Wasserfall, her- kose voorsitter, het op Stamboek se jaarvergadering gesê hulle is steeds bereid om eerder te onderhandel as om die stryd enduit in die howe te moet voer.
“Ons deur staan oop om enige dag met die LNR te onderhandel, maar ons kan nie ons mense uitverkoop nie.”
BESTE BELANG
Dr. Pierre van Rooyen, pas afgetrede hoofbestuurder van Stamboek wat steeds op kontrakgrondslag die geskil probeer besleg, sê onwaarhede en verdraaiings oor hoekom die twee partye in dié situasie beland het, doen steeds die ronde. Hy het ook benadruk dat onderhandeling altyd ’n opsie is.
“Van die dag van daardie eerste dagvaarding (in 2014 toe die LNR ’n saak teen Stamboek gemaak het), het Stamboek gesê kom ons onderhandel. Selfs die minister (van Landbou, Bosbou en Visserye) het destyds saamgestem dat dit nie in die bedryf se belang is dat die saak in die hof beland nie.”
Die LNR redeneer in hofstukke dat daar eenvoudig geen wetlike gronde is vir Stamboek se weiering om alle registrasie- en prestasiedata wat dit ontvang of op sy
‘Ons deur staan oop om enige dag met die LNR te onderhandel.’
Logix-stelsel aangeteken het, ook aan die Intergis te verskaf.
So ’n oordrag is in die nasionale belang en Stamboek behoort dit nie privaat en eksklusief vir sy eie doelwitte te hou nie.
ONAFHANKLIK
Oor die moontlikheid van eise teen individuele telersgenootskappe, sê Van Rooyen hulle het in reaksie op vrese daaroor opnuut regsadvies ingewin. Die slotsom was dat telersgenootskappe wat lede van Stamboek is, nie vir enige van die organisasie se regskoste aanspreeklik gehou kan word nie, want die organisasie is ’n onafhanklike regsentiteit. Individuele genootskappe kan ook nie vir ander eise van die LNR teen Stamboek verantwoordelik gehou word nie.