Nóg damme gaan nie dié krisis oplos
MET ’n presidensiële beleidsverklaring dat Suid-Afrika ’n waterbeperkte ekonomie is en dat die land teen 2035 die vermoë moet hê om jaarliks sy waterkapasiteit 1,6 keer te herwin, kan die land sy waterskaarste oorkom.
Só sê dr. Anthony Turton, waterkenner wat reeds die afgelope dekade probeer om pres. Jacob Zuma te oortuig om só ’n beleidsverklaring te doen. Dit sal die nodige beleggings lok om te keer dat watertekorte in komende dekades ekonomiese groei in die wiele ry.
Turton is deel van die inisiatief Water Leapathon, waardeur akademici, die sakesektor, die Regering, arbeidsorganisasies en andere, hulle beywer om die land se waterprobleme om te keer.
Volgens Turton is dit belangrik dat ’n beleidshervorming die ontsouting van seewater, die herwinning van afvalwater en die aanvulling van ondergrondse water moet insluit.
Daar word gereken dat die land teen 2035 sowat 63 miljard m3 water per jaar sal benodig. Turton kan nie ’n toekoms vir KwaZulu-Natal, die OosKaap en die Wes-Kaap sien sonder dat ontsoutingsaanlegte ’n kernkomponent van hul watervoorsiening word nie.
Turton sê Suid-Afrika se damme hou 38 miljard m3 water. Die jaarlikse volume reën stort nagenoeg 48 miljard m3 water in riviere, maar om meer damme te bou gaan weens klimaatsverandering en verdamping ’n nadelige uitwerking op rivierstelsels hê.
Die beste opsies is dus die ontsouting van seewater en, belangriker nog, die vermoë om die 38 miljard m3 opgaringsvermoë 1,6 keer te kan herwin. Hy sê Suid-Afrika het etlike suksesvolle herwinningstelsels, soos ontsoutingsaanlegte by steenkoolmyne in Mpumalanga (eMalahleni en Tweefontein), die rioolaanleg in Durban-Suid wat nywerheidsafvalwater verwerk vir die petrochemiese bedryf en aangrensende pulpmeule, en die Potsdam-rioolaanleg in Kaapstad wat gryswater verskaf om openbare ruimtes te besproei.
HERGEBRUIK
Turton sê die vorige vier geslagte het die bou van damme as die oplossing vir watervoorsiening gesien. Die wêreld verander en daarmee saam die biofisiese faktore. Daarom is ’n nuwe benadering nodig, want dit sal nie meer werk om damme te bou en water rond te skuif nie.
“Ons moet ophou om die meester en eienaars van water te wil wees. Ons sien verkeerdelik water as voorraad wat opgegaar kan word. Water is ’n vloeibare middel wat behoue bly, skoongemaak en weer gebruik word.
“Die water waarmee jy jou tande vanoggend geborsel het, het 65 miljoen jaar gelede deur die niere van ’n dinosourus gegaan.”
‘Die water waarmee jy jou tande vanoggend geborsel het, het 65 miljoen jaar gelede deur die niere van ’n dinosourus gegaan.’