Wes-Kaapse werkers in die landbou vereer
Landbouwerkers het die Wes-Kaapse Prestige Landbou-eerbewyse vir 2017 met swier by die Nederburg-wynlandgoed gevier.
Mnr. Hermanus Bienas, die Wes-Kaapse Landbouwerker van die Jaar vir 2017, wil die lewe verbeter van alle mense wat in die landbou werk.
Bienas, ’n assistentbestuurder by die Kys-kwekery op Vredendal in die Wes-Kaap, is op Saterdag 4 November as die wenner aangewys by die Nederburg-wynlandgoed in die Paarl.
Noudat hy gewen het, voel hy gemotiveer om sy gemeenskap op te hef, het Bienas gesê.
“Die eerbewys spoor my aan om oplossings te help kry vir die moeilike ekonomiese omstandighede waarin werkers in hierdie sektor hulleself bevind en wat ons soms moedeloos kan maak.”
Die Wes-Kaapse departement van landbou en Shoprite borg die kompetisie.
“Ek is geïnspireer daardeur dat Hermanus sy prestasie wil gebruik om die lewe te verbeter van sy kollegas in die landbou. Dit is ’n voorrangsaak vir die Wes-Kaapse regering,” het mnr. Alan Winde, Wes-Kaapse minister van landbou, gesê.
“Vorige wenners het dieselfde toewyding om te verseker mense in hierdie sektor bereik hul doelwitte. Met hierdie inisiatief wil ons vakmanne en -vroue in die landbou in ’n ondersteuningsnetwerk byeenbring sodat hulle hul potensiaal kan bereik,” het Winde gesê.
“Gemeenskappe is deel van Shoprite se kernbesigheid,” het dr. Johan van Deventer, hoofbestuurder van Freshmark (Shoprite se afdeling vir die verkryging en verspreiding van vrugte en groente) gesê. “Hulle is ons werknemers, klante en natuurlik ons verskaffers. Landbouwerkers lewer ’n groot bydrae tot die Suid-Afrikaanse ekonomie en danksy húlle kan ons vars produkte van topgehalte in ons supermarkte verkoop.”
Sedert 2002 het 9 369 landbouwerkers vir die kompetisie ingeskryf.