HANDEL | GWK optimisties ná moeilike jaar
Die gediversifiseerde landbougroep GWK is vol vertroue dat sy geldsake op ’n opwaartse trajek is ná hy nie in die boekjaar 2016-’17 ’n wins kon maak nie. Mnr. Llewellyn Brooks, GWK se groep- besturende direkteur, sê in ’n verklaring die maatskappy het gedurende dié jaar sy grootste kapitaalprojek tot nog toe, nuwe koringmeule en pasta- en koekie-aanlegte op Modderrivier naby Kimberley, teen ’n koste van R400 miljoen in werking gestel.
“Hoewel ons begroot het vir ’n aanvanklike verlies vir die nuwe besigheid, is dit vererger deur invoertariewe op graan, die wisselvalligheid van graanpryse en laer as verwagte maalvolumes. Ons mieliemeule op Christiana het soortgelyke omstandighede ervaar met die onbeheersde val in mieliepryse wat tot verliese gelei het,” sê hy.
Ander bedryfseenhede het ook gesukkel weens die droogte en waterbeperkings, onder meer graanbemarking en -opbergingsbesighede, versekeringsdienste en meganisasieverkope, asook die lamen skaapwaardeketting.
Die maatskappy het egter volgens hom ekwiteit van net minder as R900 miljoen, sterk kontantvloeibestuur en haalbare kort- en langtermynstrategieë vir al sy besighede.
“Ons verwag dat uitdagende omstandighede in die sektore waarin ons besigheid doen, in die afsienbare toekoms sal voortduur. Ons is egter seker dat ons in die nuwe boekjaar ons finansiële doelwitte sal bereik nadat ons goeie finansiële traksie in die eerste kwartaal van ons nuwe boekjaar gebou het.”