MEEL | Meule hoes in kartelsaak
Godrich Flour Mills van Bronkhorstspruit gaan as deel van ’n skikkingsooreenkoms R4,4 miljoen betaal in ’n tien jaar lange saak van beweerde prysvasstelling in die koring- en witmieliemaalbedryf.
Godrich is tot dusver die enigste maatskappy in dié ondersoek wat geskik het met die Mededingingstribunaal én erken het dat hy aan die verdeling van markte deelgeneem het.
Die skikking spruit voort uit ’n klag wat die Mededingingskommissie in Maart 2007 teen Tiger Brands, Pioneer Foods, Foodcorp, Pride Milling en Progress Milling aanhangig gemaak het. Godrich was onder etlike besighede wat later ingesluit is.
Tiger Brands en Premier Foods het in dieselfde jaar om korporatiewe toegeeflikheid aansoek gedoen.
Luidens ’n verklaring van die Mededingingstribunaal het Godrich ingestem om R4,4 miljoen te betaal vir sy deelname aan ’n kartel wat met ander mieliemeulens saamgespan het om die prys van gemaalde wit mielies vas te stel, asook die datums wanneer nuwe pryse in werking sou tree.
“Godrich Flour Mills het nie die kartelbesluite in werking gestel nie, maar het erken dat hy deelgeneem het aan praktyke om regstreeks of onregstreeks ’n koop- of verkoopprys vas te stel,” sê die tribunaal.
Respondente in die saak wat tot dusver met die tribunaal geskik het en administratiewe boetes betaal het, is Pioneer Foods (R500 miljoen), Pride Milling (R10,6 miljoen), Brenner Mills (R12 miljoen), Blinkwater (R10 miljoen), Keystone Milling (R6,7 miljoen), Bothaville Milling (R4,2 miljoen) en Carolina Rollermeule (R4,4 miljoen).