Kragtig, maar gerieflik
Die buigbare ontwerpkenmerke van Hyundai se boutoerusting verseker doeltreffende werk in strawwe toestande.
Hyundai se werktuie is aanpasbaar vir enige taak. Die R80-7-midi-masjiengrawe is byvoorbeeld onlangs in die Kaapse wynstreek gebruik om ou stompe uit wingerde te verwyder. Boonop was daar beperkte werkruimte, sê mnr. Alex Ackron, besturende direkteur van HPE Africa, die plaaslike alleenverspreider van Hyundai-boutoerusting.
“Die konvensionele manier waarop ou stompe verwyder is, was om ’n ketting om elke stomp vas te maak en dit met ’n trekker uit te trek. Dit was uiters tydrowend. Daniller Grondwerke, ’n maatskappy wat masjiene verhuur wat in landboubewerking spesialiseer, meen die verwydering van hardnekkige wortels is vinnig, doeltreffend en veilig danksy die gebruik van ’n Hyundai R80-7-masjiengraaf,” sê Alex.
KRAGTIG EN VEILIG
Dié taai werktuig het ’n kragtige enjin wat 250 N.m wringkrag teen 2 100 r/min. lewer. Die enjin is brandstofdoeltreffend en voldoen aan vlak 2-uitlaatgasstandaarde. ’n Gevorderde hidrouliese stelsel verseker gladde werkverrigting en maklike beheer om presisie toe te pas.
Die bestuurskajuit is wyd en ruim met lae geraasvlakke en uitstekende sigbaarheid vir groter veiligheid. Die kajuit het versterkte pilare. Kontroles is gerieflik geposisioneer volgens die jongste ergonomiese vereistes.
Grondvlaktoegang tot onderdele verseker maklike en gerieflike instandhouding.
HPE Africa se nasionale netwerk van goed toegeruste werkwinkels het al die nodige onderdele. Die maatskappy bied instandhoudingsprogramme wat in samehang met beplande staantydskedules uitgevoer word. Bestuurdersopleiding verseker optimale werkverrigting en ’n verlengde gebruiksduur vir elke werktuig. NAVRAE: www.hpeafrica.co.za