Hilux spog met nuwe voorkoms
Die toenemende gebruik van ligtehandelsvoertuie in die ontspanningsmark het tot ’n magdom produkverbeterings, toevoegings en die uitbreiding van hierdie eens hoofsaaklik nutssegment gelei.
Die moderne wêreld word deurlopend deur nuwe neigings beïnvloed. Neigings vorm gedrag, hoe ons aantrek, die kos wat ons eet, die plekke wat ons besoek, en ook die motors waarin ons ry.
Die verbruikersmark word aangedryf deur mense wat op neigings reageer. In ’n samelewing wat toenemend op kliëntediens en -behoeftes gerig is, is die reaksie op neigings belangrik en rigtinggewend.
Die mark vir ligtehandelsvoertuie is een daarvan. Danksy vrugbare veranderinge word nou van die tradisionele bakkiemark van die verlede afgewyk.
OUTOMATIESE GERIEF
Een gebied wat gewis na ’n hoër rat oorgeskakel het, is die transmissie-arena. Waar tradisionele bakkies bykans altyd handratkaste gehad het, het die groeiende nutsgebruik ’n vraag na gemakliker outomatiese transmissiestelsels laat ontstaan.
In die lig daarvan is die Toyota Hilux-reeks met ses nuwe modelle met outomatiese ratwisseling aangevul. Die enkelkajuitreeks is met die nuwe, outomatiese 2.4 GD-6 4x4 SRX 6-model uitgebrei. Dit sluit aan by die twee outomatiese 2.8 GD-6 Raider 6-modelle in hoë-rompformaat
(raised body). Hierdie modelle is toegerus met 4x2- of 4x4-aandrywing en is onlangs tot die reeks toegevoeg. Dié nuwelinge bied bykomende gemak en gerief aan nutsklante, terwyl dit ook koppelaarslytasie in swaardienstoestande teenwerk.
Die Xtra-reeks met sy verlengde kajuit word deur twee nuwe, outomatiese modelle aangevul wat die 2.8 GD-6-enjin van 130 kW en die Raider-toerustingspakket met ’n outomatiese sesgangtransmissie in 4x2- en 4x4-gewaad kombineer. Dié enjin se 450 N.m wringkrag bied moeitevrye versnelling en uitsonderlike sleepvermoë.
Die Hilux-modeltoevoegings word deur ’n nuwe dubbelkajuitweergawe met ’n gesonde 110 kW en 400 N.m uit sy GD-6enjin van 2,4 liter aangevul. Dit is gekoppel aan ’n oordra-ratkas vir vierwielaandrywing en outomatiese sesgangtransmissie met SRX-gradering.
Die binneruim van die Hilux is in reaksie op deeglike klantenavorsing en -terugvoering in pas met klante se voorkeur opgekikker. Die gewese doekstofbekleedsel vir die deurbeslag en armleunings is met uiters duursame en geharde opgestopte uretaanafwerking vervang.
Klavierswart-deurbeslag rond die prentjie deur die hele reeks netjies af.
Die Raider-modelle se gewese konsoledeksel van doekstofmiddel is met ’n nuwe, sagte leerweergawe vervang.
VEILIGHEID EN TOERUSTING
Die enkelkajuit-SRX- en Raider-modelle is op die gebied van aktiewe veiligheid aansienlik opgekikker danksy die toevoeging van voertuigstabiliteitsbeheer. Die voertuigstabiliteitsbeheer sluit ook wegtrekhulp met opdraandes en swaaibeheer vir sleepwaens in. Nuwe misligte verhoog die sig van die bestuurder van enkelkajuitmodelle in die donker.
Die res van die vlagskip-Raider-modelle is nie oor die hoof gesien nie en is ook op die gebied van styl en gerief verbeter. Al die Raider-weergawes het nou stylvolle 18”-dubbeldriespeek-allooisierwiele met 265-60-R18-veelterreinbande.
’n Sterk, eenvormige vooraansig word met ’n kenmerkende dagligrylig-gordel van die bokant van die voorste sierrooster af gevorm. Ligdiode-misligte en selfverstellende kopligte rond die ligprentjie af.
NAVRAE: Toyota Suid-Afrika, webwerf: www.toyota.co.za , tel. 0800 139 111.