ZOKWANA WERK HARD VIR UITVOER

MNR. SENZENI ZOKWANA,

Minister van Landbou, Bosbou en Visserye, beywer hom die afgelope twee jaar stil-stil vir nuwe uitvoermarkte vir mango’s, persimmons, druiwe, beesvleis, sitrus, avokado’s en selfs die varswatervis kurper.

Hy sê die uitbreiding van uitvoer is een van sy departement se strategiese voorrangsake op streeks- en internasionale terrein. Om dit te bereik moet goeie verhoudinge met sy internasionale eweknieë gesmee word.

Thailand was een van die departement se eerste suksesse, en een van die strategiese markte in die Verre-Ooste vir Suid-Afrikaanse vars produkte. In Mei 2012, ná sowat 14 jaar van onderhandelings, is ’n protokol met dié land gesluit om sitrus daarheen uit te voer, wat in Maart verlede jaar opgevolg is met die eerste vrag tafeldruiwe. Nou is die oog op die uitvoer van appels en pere. Inligting oor plase wat hierdie vrugte lewer, is reeds aan die fitosanitêre amptenare van Thailand verskaf.

Vroeër vanjaar is ’n protokol vir die uitvoer van bevrore beesvleis na China ook onderteken en onderhandelinge is reeds in ’n gevorderde stadium vir marktoegang vir avokado’s in Japan. Suid-Afrika voer reeds onder meer mielies, pomelo’s, rietsuiker en perskes na Japan uit.

In 2016 is marktoegang verkry vir die uitvoer van mango’s en persimmons na Indië en tans werk Zokwana se departement aan uitvoerprotokolle vir pekanneute.

Onderhandelings is ook reeds ver gevorder om beesvleis en sitrus na Iran uit te voer.

In Mei vanjaar het Iran reeds sy gretigheid aangedui om foreleiers van Suid-Afrika in te voer, en die eerste besending is reeds in Julie gestuur.