BLINK TOEKOMS WINK VIR MAKADAMIAS

Die vraag na makadamianeute bly sterk en hou aan om tot rekordpryse in die handelsmark te lei, sê mnr. Alex Whyte, besturende direkteur van die bekende Green Farm Nut Company, ’n maatskappy wat makadamias uit Limpopo en Mpumalanga se Laeveld-streke verwerk en uitvoer.

Whyte sê ook ál meer kopers beskou Suid-Afrikaanse makadamianeute nou as net so goed as Australië se neute. Beter verwerkingsaanlegte en verwerkingsvermoë, asook ’n groter vraag het die wêreldmark aan Suid-Afrikaanse neute blootgestel.

Whyte sê makadamias lê in die premie-voedselsegment van die mark. Daar word tans net 20% van die wêreld se makadamias as bestanddeel in voedselprodukte gebruik. Dit is baie min vergeleke met amandels, waarvan omtrent 80% van die wêreldproduksie na die bestanddele-mark gaan.

Die goeie nuus is egter dat al hoe meer voedselvervaardigers makadamianeute as bestanddele in onder meer pasta, botter, koekies en roomys gebruik.

Whyte sê daar is ’n toename in die vraag na natuurlike, gesonde bestanddele in kos. Dit word veral gesien in lande waar die gemiddelde ouderdom van die bevolking al hoe hoër word. Whyte sê Suid-Afrika se goeie beheer oor chemikalieë en die gebruik van geregistreerde produkte tel in produsente se guns.

Hy sê die makadamiabedryf sal deurlopend navorsing na die neut se gesondheidsvoordele moet doen en dit met mening moet bemark.