Saaiboere op hete kole
NÁ maande van onverpoosde voerskenkings aan droogtegeteisterde dele van die Oos-, Wesen Noord-Kaap is die vrygewigheid van Suid-Afrikaanse boere nóg nie op ’n einde nie.
Verlede week is 1 500 bale oulandsgras van die Neuhoff-boerdery by Delmas met die samewerking van Agri SA na Beaufort-Wes vervoer – twee seisoene nadat die Neuhoff-boerdery self deur ’n knellende droogte moes kom.
“Wanneer ’n boer self in so ’n posisie was, besef jy watter impak dit op ’n boerdery het as jy nie ’n uitweg sien nie. Dit het ons aangespoor en ons kon die bale skenk aan mede-boere wat dit nodig het,” het mnr. Francois Neuhoff gesê toe die konvooi van 30 vragmotors verlede Dinsdag vertrek het op die tog van net meer as 1 000 km. Lees meer by
HULP VIR ANGORABOERE
Intussen het die sybokhaarkoper en -verwerker Samil Natural Fibres met behulp van buitelandse vennote geld bewillig om 15 vragte voer aan Angorabokboere te skenk. Een vrag van 720 sakke mielies is verlede week op Steytlerville in die Suidoos-Karoo afgelaai (foto regs). Die besending is een van 15 soortgelykes wat met dié geld gekoop is.
Volgens ’n woordvoerder van Samil het die maatskappy self eerstehandse blootstelling aan die uitmergelende droogte in die Karoo en groot dele van die Oos-Kaap. Mnr. Francis Patthey, voorsitter van Samil, sê hulle wens hulle kon nóg meer doen om boere te help aangesien dié bedryf dringend gestabiliseer moet word.
Die Sybokhaartrust het vir die vervoer van die mielies betaal. Vragte is ook afgelaai op Prins Albert, Leeu-Gamka, Oudtshoorn, Beaufort-Wes, Rietbron, Willowmore, Aberdeen, Klipplaat, en Jansenville.