Hart tot hart
Mense wat sukses nastreef, moet hulself altyd eers afvra: Is daar ’n betroubare resep vir sukses? Dit kan tog nie so uit die bloute op jou neerdaal nie. Hierdie vraag, as dit reg beantwoord word, moet egter eers deur ’n ander vraag voorafgegaan word. Van watter soort sukses praat jy? Daar is iets soos korttermynsukses wat vinnig voortsnel, ’n paar lyke langs die pad laat en dan net so vinnig weer verdwyn.
Daaroor het C.J. Langenhoven gesê: “As die kortpad die beste pad was, dan sou die hoofpad daarlangs geloop het.” Die prys vir korttermynsukses is dikwels onverdedigbaar hoog en kan vernietigend wees.
Volhoubare sukses is iets anders. Dit bring langtermyn vreugde en kan selfs voortgaan lank nadat die skepper daarvan heengaan. Wie ken nie die vreugde van die herinnering aan Oupa en Ouma wat lank voor ons geboorte iets tot stand gebring het waarvan ons vandag nog die voordeel geniet nie?
Wanneer daar gelet word op die wyse waarop ons mense die planeet bestuur, kom die begrippe kort en lang termyn ook ter sprake. Die een getuig van die aakligheid van vernietiging, terwyl die ander die krag van volhoubaarheid verkondig.
As jy góú wil ryk word, moet jy ’n goeie plan bedink om vinnig te vernietig en net so vinnig bymekaar te maak tot jou eie voordeel. Wat elders in die wêreld gebeur, weet ek nie, maar Afrika is ’n skokkende voorbeeld van grootskaalse vernietiging om ’n paar rykes verder te verryk.
Dink aan onoordeelkundige ontbossing, die talle myne wat onderaardse grafkelders agterlaat, waterbesoedeling en vermorsing, gronderosie wat miljoene tonne grond die see in stort. Dink aan die talle uitgestorwe plant- en diersoorte – die stille getuies van sinlose vernietiging, die grafgrawers van God se mooi skepping.
Stel daarteenoor die mense wat volhoubare sukses nastreef, wat iets moois wil nalaat vir geslagte wat kom. Vra jouself dan af: Wat laat ek na as ’n getuienis dat ek ’n bydrae gelewer het om God se onbeskryflike mooi planne volhoubaar in stand te hou?
Die prys vir korttermynsukses is dikwels onverdedigbaar hoog en kan vernietigend wees.