Vragmotors wat die ekstra myl aflê
Die vervoer- en landboubedryf het baie gemeen. Nie net speel albei ’n belangrike rol in die Suid-Afrikaanse ekonomie nie, maar albei bedrywe kom ook daagliks voor risiko en werklikhede te staan.
Voordat ’n mens in ’n nuwe vragmotor belê, moet ’n paar belangrike faktore eers oorweeg word, soos watter model vragmotor die beste by jou soort onderneming pas, die samestelling van sleepwagroepe, die vereistes van verskillende bedrywighede en padtoestande.
Mnr. Gert Swanepoel, besturende direkteur van UD Trucks Southern Africa, sê die maatskappy is geesdriftig daaroor om vlooteienaars se werkdag eenvoudiger en produktiewer te maak – of hulle nou met streeksverspreiding of langafstandvervoer gemoeid is.
LOONVRAG
Die vervoerkonsultante by UD Trucks se landwye handelaarsnetwerk oorweeg verskeie faktore wanneer hulle ’n kliënt adviseer oor watter spesifieke model en werktuig om te gebruik.
Produktiwiteit is byvoorbeeld uiters belangrik. Klante kry inligting oor wat die beste kombinasies is ten opsigte van die loonvrag, gemiddelde snelheid en brandstofverbruik.
“By UD Trucks glo ons die regte voertuig sal die klant in staat stel om sy sake doeltreffend te bestuur. Dit vorm ook die hoeksteen van ons staatmakerdiens. Danksy ons vervoerkonsultasiediens kan ons klante oor die beste voertuig vir hul voorgenome werk adviseer,” sê Gert.
STAATMAKER
Quester, die ekstraswaarreeks van UD Trucks, geniet reeds groot aanhang op die plaaslike mark. Dit is ideaal vir die landboumark met 6x4- vaste vragmotors wat 245 kW teen 2 220 r/min. aan voertuigeienaars bied, asook 1200 N.m wringkrag teen 1 200 r/min. tot 1 600 r/min.
Dié vragmotors is standaard toegerus met ’n dakslaapkajuit en kajuitbed. Dit het ook ’n moderne telematiese stelsel waarmee vragmotoreienaars hul vlote doeltreffender kan bestuur.
Die Fuel Coach, waarmee die bestuurder inligting kry oor die beste bestuurstoestande en -metodes om brandstof en tyd te bespaar, is ook standaard.
“Die Quester-reeks kombineer UD Trucks se Japannese erfenis met wêreldwye hulpbronne en die kennis van Suid-Afrikaanse kenners,” sê Gert.
“Die voertuie is taai en maklik om te onderhou. In wese is dit ’n sakehulpmiddel wat elke dag harde gebruik kan weerstaan, veral van die pad af. Dit staan vir gehalte en duursaamheid. Die reeks word ondersteun deur verskeie konfigurasies met maklike bakwerkmontering om aan ons klante ’n doelgemaakte oplossing vir alle soorte toepassings te bied.”
HANDELAARS
UD Trucks het ’n uitgebreide handelaarsnetwerk in die hele Suid-Afrika. Daar is ook handelaars in Botswana, Lesotho, Mosambiek, Namibië, Swaziland, Zambië en Zimbabwe.
“Ons plaas groot klem op langtermynverhoudings met ons klante en verskaf deurlopende steun vir die duur van ’n produk se gebruiksiklus. UD Trucks se handelaars is verbind tot die lewering van vernuwende vervoeroplossings en diensaanbiedinge aan hul klante. Dit word gebou op vertroue, grondige kennis van die bedryf en ’n stewige arsenaal tegniese vaardighede,” sê Gert.
NAVRAE: Webwerf: www. udtrucks.com; e-pos: info.support@ udtrucks.co.za; tel. 012 564 9500.