VERSEKER SÓ TEEN VOËLGRIEP

SUID-AFRIKA se ekonomie het na raming tot dusver minstens R3 miljard se skade weens die hoogs aansteeklike H5N8-voëlgriepvirus gely.

Tog is min ondernemings blykbaar daarteen verseker. Só sê mnr. Pierre du Preez, verhoudingsbestuurder by Afgri se Unigro Financial Services, wat sedert Augustus ’n produk van Lloyds of London in Brittanje bemark wat dekking teen voëlgriep insluit.

Hy sê wêreldwyd is daar ’n paar versekeraars wat dekking teen voëlgriep bied, maar die meeste is huiwerig vir dekking buite Europa en Amerika weens regerings se trae reaksie met uitbrekings.

“In die Europese Unie en Amerika word gevalle onmiddellik aangemeld en plase onder kwarantyn geplaas, wat die verspreiding in sy spore stuit. Staatsvergoeding bied ’n vangnet wat die boere beskerm en aanmoedig om gevalle vroegtydig aan te meld.

“In Suid-Afrika kyk mense soms egter eers of hulle die probleem self kan oplos. As dit dan hand uitruk, stel hulle die staat in kennis, wat soms traag is om te reageer.”

Die versekeringsproduk is op voëlgriep toegespits, maar kan uitgebrei word om omvattende dekking vir bates, soos hokke, in te sluit.

Dit kan ook ander siektes, soos Newcastle-siekte, Mycoplasma gallisepticum en salmonella, en verlies aan inkomste weens die onderbreking van die boerdery, insluit.

Premies kan wissel van 1% tot 10% van die waarde van ’n totale broeisel, na gelang van die boerdery se risikoprofiel. ’n Boer se vlak van biosekerheid bepaal of hy dekking kan kry.