Wol se bulmark is ‘die nuwe normaal’
WOLPRYSE gaan dié seisoen van krag tot krag. Boere het by drie opeenvolgende veilings meer as R200/kg vir vetwol in hul sak gesteek.
Hoewel daar nie op 15 November se veiling weer ’n rekordprys behaal is nie, het die markaanduider met ’n verdere 1,3% gestyg om op R197,43 (skoon) te sluit.
In sy Oktober-markoorsig sê Cape Wools hoewel die swakker rand die mark ondersteun, is die onderliggende sterk vraag na wol van goeie gehalte die vernaamste rede vir die puik prestasie.
Die markaanwyser vir Merinowol was op die laaste veiling in Oktober vanjaar op R181,99 per kilogram vir skoonwol, sowat 20% hoër as op die ooreenstemmende veiling ’n jaar gelede. Die Australiese markaanwyser het in dieselfde tyd met 17% verbeter.
Hoewel ’n verdere verswakking van die rand stukrag aan die mark kan gee, maan Cape Wools dat die prys van fynwol van 18-19 mikron waarskynlik ’n boonste draaipunt bereik het, maar dat die prys van 21 mikron-wol nog verder kan styg.
Die vier grootste bestemmings op ’n waardegrondslag vir SuidAfrikaanse wol van Julie tot September was China (61,9%), Italië (17,3%), die Tsjeggiese Republiek (10,6%) en Bulgarye (4,1%).
Mnr. Louis de Beer, uitvoerende hoof van Cape Wools, sê die bulmark wat die wolbedryf kenmerk, is die “nuwe normaal”. Dit word gedryf deur nuwe produkontwikkeling, sterk verbruikersvoorkeur en ’n wêreldwye aanbod op die laagste vlakke in 70-90 jaar.
SKANDAAL
Intussen het ’n skandaal die Australiese wolbedryf getref toe daar by ’n meule in China beslag gelê is op 18 bale wol wat nie met die toetsresultate in Melbourne ooreenstem nie. Die polisie in die Australiese deelstaat Victoria meen daar is met die bale gepeu-
ter nadat dit getoets is. Daar word gevrees dat dit die integriteit van makelaars wat die uitvoer van wol behartig, in die gedrang kan bring. Die saak word nog ondersoek.