Volstruisbedryf is steeds katvoet

DIE uitbreking van die hoogs aansteeklike H5N8-voëlgriepvirus het die volstruisbedryf vanjaar hoofsaaklik deur ’n beperking op die uitvoer van vleis geraak, en nie – soos met vorige uitbrekings van ander voëlgriepstamme – deur die uitslag van kuddes nie.

Die bedryf het in 2004, 2006 en 2011 uitbrekings van ander hoogs aansteeklike voëlgriepvirusse gehad, waartydens kuddes op besmette plase uitgeslag moes word. Boere is daarvoor vergoed, maar dit het die belastingbetaler baie geld gekos.

Mnr. Piet Kleyn, uitvoerende hoof van die Suid-Afrikaanse Volstruisbedryfkamer, sê die kennis en ondervinding van die bedryf en die Departement van Landbou, Bosbou en Visserye het egter sedertdien baie uitgebrei. Daar word nou aanvaar dat volstruise hul eie immuniteit opbou en daarom is vanjaar nie vereis dat kuddes uitgeslag moet word nie.

“Volstruise vrek nie – soos hoenders – weens die siekte nie, maar bou immuniteit op. Ná sowat vier tot ses weke oorkom hulle die siekte en dan kom die siekte op ’n natuurlike wyse op die betrokke plaas tot ’n einde,” sê Kleyn.

PRODUKTE UITGEVOER

Benewens die belemmering van die uitvoer van vleis, word die bedryf nie vanjaar andersins ernstig deur die uitbreking geraak nie, aangesien volstruisleer en -vere soos gewoonlik uitgevoer kan word.

Suid-Afrika het sedert 23 Junie vanjaar sy voëlgriepvrye status verloor. Die bedryf kon toe nie meer vars volstruisvleis uitvoer nie, maar wél hittebehandelde vleis.

Kleyn sê wanneer die hoogs aansteeklike voëlgriepvirus in ’n kudde gevind word, mag hittebehandelde vleis vanaf daardie plaas en plase binne ’n omtrek van 10 km óók nie uitgevoer word nie. Volstruise van voëlgriepvrye kuddes mag wél vir die plaaslike mark geslag word.

“Volstruisvleis bied vir die plaaslike verbruiker ’n produk wat volgens uitvoerstandaarde geslag en teen baie goeie pryse beskikbaar is.”

MINDER GEVALLE

Die getal aangemelde uitbrekings van die hoogs aansteeklike H5N8-voëlgriepvirus het intussen danksy die warmer weer begin afneem.

Mnr. Senzeni Zokwana, Minister van Landbou, Bosbou en Visserye, het in ’n onderhoud met Landbouweekblad spesifiek na die volstruisbedryf verwys. Hy het volstruisboere gevra om waaksaam te wees en streng biosekerheidsmaatreëls toe te pas om kontak met wilde voëls te beperk.

Kleyn sê die bedryf volg deurlopend ’n streng moniteringsproses, wat behels dat volstruise wat na ’n slagplaas verskuif gaan word, eers vir verskillende siektes getoets moet word. Selfs op plase waar diere nie vir slag gelewer word nie, word twee keer per jaar vir siektes getoets.

Nadat die nodige prosesse gevolg is, sal die bedryf dalk in die toekoms die moontlikheid van die inenting van broeivoëls oorweeg sodat die verlies aan kuikenproduksie beperk kan word.