HELP BOERE SÓ MET VEILIGHEID
’n Mens mag nie begeer nie, maar daar is ’n groot behoefte aan begrip vir en ondersteuning aan ons boerderygemeenskap, veral in sekere geteisterde dele van Suid-Afrika.
As mense, en dit sluit alle burgers van die land in, en veral sekere groot private maatskappye en verskaffers aan die landboubedryf, net vir ’n oomblik wil besin, sal hulle verstom staan dat hulle met oogklappe aan gulde geleenthede by hulle laat verbygaan.
Kom ons vra vir Cell C, MTN en Vodacom wat hul bydrae tot Suid-Afrika se boerderygemeenskap spesifiek is. Hulle het die vermoë om miljoene rande aan TV-advertensies, sportspanne en ander bedrywighede te bestee.
Hul bedryf leen hom uitstekend daartoe om moderne tegnologie te gebruik om kommunikasie aan die landelike en veral boeregemeenskap beskikbaar te stel. Vergeleke met die astronomiese bedrae wat hulle aan borgskappe en advertensies bestee, sal dit hulle nie veel kos om hul steun aan die boeregemeenskappe te toon nie.
Kom ons daag hulle uit om projekte vir die veiligheid van ons boere van stapel te stuur. Wat van ’n “boereveiligheidshulplyn” met ’n spesiaal gereserveerde nommer? Wat van ekstra torings waar boere geen of ’n bitter swak sein het?
Ek nooi graag die selfoonreuse om ’n toring om my plaas te kom oprig sodat ons boere beter kommunikasie kan hê tydens ’n noodgeval. Wie gaan dié uitda- ging aanvaar? Daar is ’n legio geleenthede wat hulle kan aangryp om ons boere te ondersteun.
Dan kan die Minister van Polisie ons boere ook tegemoet kom. Skep ’n spesiale stelsel vir boere wat om selfverdedigingswapens aansoek doen deur die proses van die nasionale aansoekhanteringsproses te skei ten einde boere se aansoeke te bespoedig. Tans duur my aansoek slegs om ’n bevoegdheidsertifikaat te kry twee tot drie maande. Dan eers begin die proses om om ’n vuurwapenlisensie aansoek te doen. Teen die tyd wat die wapenaansoek goedgekeur is, is ek al vermoor.
Wat doen die groot vuurwapenhandelaars en jagtersverenigings spesifiek om die boere se saak te verbeter? Hulle is baie stil in hierdie opsig, of is dit omdat alle boere nie lid is van hulle nie? Sonder die boer se grond is daar net wild op nasionale en bewaringsgrond. Daar is dus geen diere of jag sonder die boer se grond nie.
En wie gaan jagwapens koop as daar nie meer plase is wat jaggeleenthede bied nie?
Ek vra weer, besin net vir ’n oomblik oor boere se oproep om veiligheid. En my uitdaging aan die selfoonreuse staan. JAMES BOUCHER Aliwal-Noord