Boere staan sentraal in plan vir herlewing
DIE kommersiële landbou is klaarblyklik een van die hoekstene vir die herlewing van Zimbabwe ná die einde van pres. Robert Mugabe se 37 jaar lange bewind.
Dokumente wat vroeër vanjaar deur die nuusagentskap Reuters bekom is, dui daarop dat mnr. Emmerson Mnangagwa, Mugabe se klaarblyklike opvolger, reeds aanvoorwerk gedoen het vir duisende wit boere wat van hul plase verdryf is, om weer in Zimbabwe te kom boer en vergoeding te ontvang. Van dié dokumente beweer Mnangagwa het reeds so vroeg as 2015 met verteenwoordigers van die land se kommersiële landbou-unie (CFU) begin onderhandel.
Tussen 1998 en 2008 het Zimbabwe se bruto binnelandse produk omtrent gehalveer ná Mugabe se rampspoedige grondhervormingsprojek, waarin wit boere se plase aan onervare, swart boere oorhandig is.
BOERE MAAK PLANNE
Zimbabwiese boere het op hul beurt reeds begin werk aan ’n strategie om die landbou op dreef te kry as die bewindsverandering met nuwe beleid gepaardgaan.
Dr. Theo de Jager, voorsitter van die Wêreld-boereorganisasie (WFO), is reeds die afgelope drie jaar betrokke by gesprekke tussen die land se vier landbou-unies: Die CFU, die Zimbabwiese nasionale landbou-unie (ZNFU), die Zimbabwiese landbou-unie (ZFU), en die Zimbabwiese kommersiële landbou-unie (ZCFU).
De Jager, ’n erelid van die CFU, het bevestig dat die unies die afgelope paar jaar samesprekings voer om as een stem met die regering te praat oor ’n nuwe landboustrategie. Hul boodskap is dat geen ander sektor van Zimbabwe se ekonomie die potensiaal van die landbou het om die land weer op die been te kry nie.
VERGOEDING NODIG
De Jager sê die sekerheid wat nodig is vir beleggings om in te vloei sal slegs verkry word wanneer diegene wie se grond afgevat is, daarvoor vergoed is. “Die voorstel is dus dat almal vergoeding moet kry: Die wit boere wat grond voor 2000 verloor het, asook die swart boere wat grond gekry het, maar nooit hul landboubedrywighede op dreef kon kry nie.”
Hy sê boere is opgewonde oor die leierskapverandering en glo die landbou in Zimbabwe kan weer ’n kans staan.