BOERE LY STEEDS WEENS DROOGTE
ROOIVLEISBOERE in KwaZulu-Natal is betreklik optimisties ná wydverspreide reën oor die Middelland en die noorde van die provinsie, maar die provinsie is nog nie heeltemal uit die kake van die droogte verlos nie.
“Daar is nog groot gedeeltes in die noorde van KwaZulu-Natal wat regtig droog is,” sê mnr. Hendrik Botha, voorsitter van die KwaZulu-Natalse Rooivleisprodusente-organisasie (KZNRPO) – veral dele van Zoeloeland se kommunale streke en die noorde van die provinsie.
“Ondanks die droogte in hierdie gedeeltes is ons dankbaar om te sê die veegetalle in die provinsie het nie so drasties soos in ander dele van Suid-Afrika gedaal nie,” sê Botha. Hy het verwys na die Nasionale Rooivleisprodusente-organisasie se data wat wys dat die nasionale koeikudde met 15% tot 17% gedaal het.
“KwaZulu-Natal se kuddes het taamlik goed deur die droogte gekom en wat produksie betref, is die provinsie in ’n goeie posisie,” het Botha gesê.
Daar is wel kommer oor dieregesondheid, met verslae van uitbrekings van siektes, soos rooiwater en beestuberkulose, op sommige plase in Zoeloeland. Daar is ook kommer oor bek-enklouseer, veral in gebiede wat aan Suid-Afrika se buurlande grens.
Botha meen egter dat die KwaZulu-Natalse Dieregesondheidsforum, met die samewerking van die nasionale Departement van Landbou, Bosbou en Visserye se veeartsenydiens en veeartsenyorganisasies, hanteer die kwessies goed.
VEEDIEFSTAL
Intussen bly veediefstal ’n groot probleem in die provinsie.
“KwaZulu-Natal is op een na die digbevolkste provinsie in Suid-Afrika. Met die werkloos- heidsprobleem en wetteloosheid in die provinsie is veediefstal ’n wesenlike probleem en ’n groot bron van kommer vir ons boere. Boonop grens ’n groot deel van KwaZulu-Natal aan Lesotho en veediefstal vind na albei kante van die grens plaas.
“Boere in verskillende distrikte is egter goed georganiseer en ons werk ook sover moontlik goed saam met die verskillende veediefstaleenhede in die provinsie,” sê Botha.
“Ongelukkig word slegs 30% van veediefstalgevalle tans aangemeld, grootliks weens die baie rompslomp om ’n geval aan te meld,” sê Botha.
“Die prysaanpassing vanjaar het vleisboere egter ekonomies gesproke in ’n beter posisie teenoor ’n jaar gelede geplaas. Ons is dus optimisties oor die pad vorentoe en oor die bedryf,” sê Botha.