KOMMER OOR INVOER UIT LANDE MET SUBSIDIES
DIE Suid-Afrikaanse suiwelbedryf is internasionaal mededingend, maar kan moeilik meeding met produkte uit lande waar die staat produsente ondersteun.
Dié onmededingende praktyke in ander lande veroorsaak dat die plaaslike bedryf se produkte onmededingend word, sê mnr. Melt Loubser, voorsitter van die Suid-Afrikaanse Melkprosesseerdersorganisasie (Sampro).
Loubser het op die 13de Afrika-suiwelkonferensie en -tentoonstelling (Afda) in Johannesburg gesê plaaslike markte werk goed, en in teenstelling met groot skommelinge op die internasionale mark is vraag en aanbod hier in ’n groot mate in balans.
Weens die invoer van goedkoop langlewemelk uit Pole word langlewemelk in Suid-Afrika ’n produk wat onderhewig is aan baie skommelinge – veel meer as ander produkte. Hy sê die prys van Pole se langlewemelk is beduidend laer as dié in die res van die wêreld.
“Produkte waarby daar aan die
produksiekant deur maatreëls ingemeng is, sal die ontwikkeling van ons eie bedryf belemmer. Afrika moet sy eie produksiepotensiaal inspan as hy wil ontwikkel, anders sal hy deur die res van die wêreld bedien word.”
MEDEDINGENDHEID
Volgens Loubser is dit belangrik dat bedrywe en regerings bedag is op die invloed wat handel kan hê met lande waar subsidies betrokke is. Deurlopende verbetering van die Suid-Afrikaanse suiwelbedryf se mededingendheid is noodsaaklik. Dit moet geskied deur aksies van die bedryf en verbeterde dienslewering deur die openbare sektor.
Suid-Afrikaanse suiwelprodukte ding nie net met plaasvervangerprodukte en ingevoerde suiwel mee nie, maar ook met talle ander produkte en dienste.
Mnr. Alwyn Kraamwinkel, uitvoerende hoof van Sampro, het gesê ’n bedryf se mededingendheid moet verhoog word om bestand te kan wees teen internasionale mededinging. Daar moet egter ook gepaste handelstelsels wees.
In die lig van talle vryehandelsooreenkomste tussen Afrikalande wat tans oorweeg word, meen hy vrye handel ten opsigte van suiwelprodukte moet beperk word tot suiwelprodukte wat hul oorsprong net in Afrika het.
“As dit nie gedoen word nie, sal suiwelprodukte wat gemaak is van melkpoeier wat teen kunsmatig lae pryse van buite Afrika ingevoer word, die Afrika-mark oorheers. Dit sal die uitbreiding van veral melkproduksie in Afrika ernstig aan bande lê.”
Kraamwinkel sê egter ook die suiwelbedryf moenie sonder meer die skuld net op invoer pak wanneer hy nie geld maak nie.
Loubser meen internasionale handel is ’n gemeenskaplike probleem vir almal in die suiwelbedryf in Afrika. Bedrywe op die vasteland moet saamstaan om beleid ter bevordering van ekonomiese ontwikkeling in Afrika te beïnvloed.