Reëlings ná die begrafnis

Verlede week is die administratiewe en logistieke sake bespreek wat binne ’n gesin en onderneming hanteer moet wanneer iemand sterf. Dié week is die reëlings wat ná die begrafnis getref moet word, aan die beurt.

Die dood is meestal ’n groot skok en ontwrigtend en onaangenaam vir die mense wat agterbly. Ná die begrafnis of gedenkdiens, wanneer almal huis toe is en die lewe moet voortgaan, begin die probleme. Afgesien van ’n mens se emosionele toestand en die alleenheid wat jou tref, moet verskeie sake aandag kry, veral wanneer ’n gade of lewensmaat gesterf het. Kontant is nodig vir onmiddellike uitgawes en om aan te gaan met daaglikse sake. Die eksekuteur kan kontant voorskiet as hy seker is die boedel het genoeg kontant. Gades behoort egter lank voor die tyd ’n eie bankrekening te kry om geld daarin te hou vir tye soos dié. ’n Eksekuteur moet eers sy aanstellingsbrief van die Meester van die Hooggeregshof kry en dit kan lank duur. Die persoon wat agterbly, moet by die oorledene se werkgewer reël vir uitbetalings van die pensioen- en/of voorsorgfonds. Klop aan by die makelaar om die testament op te spoor en om polisbesonderhede in die hande te kry. Dit is noodsaaklik om die oorledene se sake-ondernemings te laat voortgaan. Die gade wat agterbly, moet ’n eie bankrekening oopmaak indien hy/sy nog nie een het nie. In die geval van mense wat binne gemeenskap van goedere getroud was, word alle bankrekeninge gevries en die langslewende benodig ’n bankrekening om polisopbrengste te kan ontvang. Nuwe debietorders moet ingestel word. Die boedel moet aangemeld word. Dit kan tot agt maande of langer duur om ’n boedel af te handel, na gelang van hoe ingewikkeld die boedel is. Al die nodige en relevante dokumente moet vir die eksekuteur bymekaargemaak word. In sommige gevalle gaan die langslewende ’n werk of ander blyplek moet soek. Dalk moet die bestaande huis verkoop word om ’n kleiner eiendom te kan koop. Om die huis of plaas te kan behou, moet die langslewende soms ’n verband op die eiendom uitneem. Dit word aan die eksekuteur betaal in ruil vir die eiendom en moet deur die langslewende afbetaal word. Dit word “quid pro quo” genoem. In baie gevalle moet die kinders se (toekomstige) versorging aandag geniet. Die oorledene se persoonlike besittings moet uitgesorteer en hanteer word. Indien ’n grafsteen opgerig moet word of as die oorledene se as in ’n nismuur gebêre word, moet die inskripsies op die grafsteen of gedenkplaat aandag kry. Soms moet korttermynversekeringseise ten opsigte van motors, bote, vliegtuie en ander bates met die samewerking van die eksekuteur uitbetaal word. Wysig so gou as moontlik enige vuurwapenlisensies, asook munisipale rekenings en deposito’s. ’n Nuwe testament moet opgestel word, anders vererf die langslewende se besittings dalk intestaat. Lewensversekering, uittree-annuïteite en pensioen- en voorsorgfondse moet weer aandag kry en aangepas word ten opsigte van die langslewende. Beleggings moet gedoen word as baie kontant ontvang word uit die eersterwende se boedel en versekering, asook uit die pensioen (se een derde) en die voorsorgfonds van die oorledene. Onthou dat ’n mens met R1 000 000 ’n inkomste van sowat R6 000 per maand voor belasting kan koop. Die korttermynpolis moet op die naam van die langslewende oorgeplaas word. Die eksekuteur behoort die boedelgoed te verseker vir korttermynrisiko’s terwyl die bereddering aan die gang is. Sekere bates is uitgesluit van die gemeenskaplike boedel by ’n huwelik wat binne gemeenskap van goedere is omdat dit geërf is en die erflater dit as sodanig in sy testament bepaal het. Addisionele advies is dikwels nodig ten opsigte van verbande, dekkingsverbande, die beredderingsproses en die oorledene se besigheid. Moenie oorhaastig weer trou nie. Waak teen familie en vriende wat geld wil leen en dit nie terugbetaal nie, want hulle weet hulle kan nie gedagvaar word as die persoon nie meer leef nie.