WINDLANING VIR GROENTE
’n Boer van Bothaville het ’n slim plan beraam om rog as ’n windlaning vir sy wortels te plant.
Windskade by wortels in die vroeë groeistadium is vir mnre. Toks Liebenberg van die groente verskaffer Greenpak en Attie Grobler, plaasbestuurder van Fraaiuitsig, wat deel is van Greenpak, ’n groot probleem.
Om windskade te beperk, het hulle deurlaatbare plastieknette begin installeer net ná planttyd en ná sowat drie weke, wanneer die wortels minstens op ’n drieblaarstadium is, verwyder. Die net laat genoeg water en sonlig deur om gesonde groei in die vroeë groeistadium te verseker.
Dit is egter ’n duur en arbeidsintensiewe praktyk. Daarom beproef Toks en Attie nou rog as ’n tussengewas, wat ook as ’n windlaning kan dien.
Toks het vier fyn saadplant bakkies opsy A gr i c o la-groentesaad planter aangebring. Hy plant daarmee vier rye rog tussen sy nege rye wortelsaad. Die idee is dat die rog vinniger as die wortels gaan ontkiem en groei en ’n doeltreffende buffer teen windskade sal verseker.
Die proef lyk in hierdie stadium belowend, al sal geringe verstellings gemaak moet word om die rog oor al vier rye ewerediger te kry.
Vanjaar was die eerste jaar dat hulle hierdie plan beproef het. Toks meen die resultate lyk belowend genoeg dat hy verdere proewe sal doen.
Een van die geheime is klaarblyklik om die dieptebeheer van die rog perfek te kry sodat dit vinnig ontkiem en opkom om ’n doeltreffende windbuffer te verseker.
’n Bykomende voordeel is die lewende wortels in die grond, asook die organiese materiaal wat op die grond gelaat word.
Tans beproef Toks ook nog die ideale tyd om die rog met ’n grasdoder dood te spuit. “Sodra die bogrondse spasie van die wortels deur die rog belemmer word of daar oorskaduwing plaasvind, sal ons die rog doodspuit, maar die perfekte tydsberekening moet ons nog vasstel.” –