TRAUMA VAN DIE DROOGTE
Die droogte is soos ’n langtermyntrauma wat nie verbygaan nie, sê me. Helene Smit, trauma-berader van Prins Albert, wat vroeër vanjaar oor die uitwerking van die droogte op boere se gemoedere op die dorp se landbouskou gepraat het.
“Anders as die trauma wat in ander gevalle ervaar word, kom boere tydens droogtes nie by die planmaakstadium uit nie omdat die droogte voortduur en hulle in die omgewing bly,” sê mnr. Joseph Steyn van die plaas Rietfontein, Prins Albert, wat die sessie op die skou gereël het.
Mnr. Carl Opperman, uitvoerende hoof van Agri Wes-Kaap, sê party veeboere sukkel al drie, vier jaar om genoeg voer vir hul kuddes in die hande te kry, want die reën kom net nie meer wanneer dit moet nie. “In hierdie situasie was die medemenslikheid van die boeregemeenskap ’n ongelooflike getuienis van die spesiale bedryf waarin ons werk. Die
mate waartoe diegene wat self omtrent niks meer oorhet nie, bereid was om steeds aan iemand te gee wat minder as hulle het, was ongelooflik.
“Nietemin is daar boere wat sukkel om kop bo water te hou en dit vreet aan hul gemoedere. In so ’n situasie moet bure en gemeenskappe uitreik en help waar hulle kan. Ons moet onthou die moeder is die baken van hoop van ’n huishouding en ons moet hul hande sterk maak en sorg dat hulle steeds kos het om vir hul gesinne voor te sit. Dit is nie net die plaaseienaars wat in hierdie tyd deur erge trauma gaan nie, maar ook die plaaswerkers, húl vroue en kinders. Ons moet na al hierdie mense omsien en seker maak dat daar ’n flikkering van hoop bly brand.
“Daarbenewens moet ons besef hierdie weerstoestande is die nuwe normaal en ons moet dit as ’n geleentheid gebruik om vorentoe te gaan, om nuwe tegnologie te ontwikkel en toe te pas om volhoubaarheid in die toekoms te verseker,” sê Carl.