VURIGE VOGGIES UIT DIE KETEL
Net buite Oudsthoorn lê Grundheim-wyne, die tuiste van die Grundling-familie, waar daar al sedert 1858 witblits gestook, wyn gemaak en lekker geëet word.
Op Grundheim se witblits-reeks se etikette pronk ’n parmantige bulterriër, want die inhoud van die bottel het net so ’n sterk byt soos daardie terriër!
Op Dys en Elana Grundling se plaas word witblits nog op die tradisionele manier met hout gestook. Hulle is die sesde geslag witblitsstokers en wynmakers op Grundheim. Met name soos Windpomp, Brandslang en Danie se Withond, gaan jy nie maklik verby ’n bottel Grundheim-witblits loop nie!
Benewens witblits word daar ook wyn, muskadel, port, likeur en potketelbrandewyn op Grundheim gemaak.
Dys, wat ook die wynmaker op Grundheim is, kan nie sonder sy gesoute stoker, Jan Goliath, werk nie. Nes sy pa en oupa voor hom behartig Jan die stookproses soos ’n meester.
“Ek en Jan het saam grootgeword en ken mekaar goed. ’n Konsultant het destyds vir my gesê: ‘As jy met oop vuur stook, is daar geen boek of skrif met reëls waarby jy kan hou nie. Die persoon wat die stookketel hanteer, moet ’n aanvoeling daarvoor ontwikkel.’ Jan het daardie aanvoeling en is passievol oor sy werk,” sê Dys.
Terwyl Dys en sy span vir die drank verantwoordelik is, is die spyse weer sy kunstige vrou, Elana, se afdeling en liefde. Elana het in ’n voedselrigting studeer voor sy in die Karoo kom woon het. Kosmaak en onthaal is vir haar heerlik.
Elana se kerrievis en lamsnek is Dys se gunstelinge, hoewel hy alles geniet wat sy maak. “Ek moet net soms raas oor al die kostydskrifte wat sy koop!” skerts hy.
Elana berei vir Elma een van haar staatmakerresepte voor – ’n korslose spinasiepastei, wat perfek afgerond word met ’n pikante lemmetjie-jenewertert om vir nagereg te geniet.