“ Môre se afslaers
Glo in jouself en die produk wat jy verkoop, sê die jong afslaers wat tydens ’n onlangse streekkompetisie op Sandringham buite Stellenbosch op die rostrum geklim het.
‘Dis soos klavierspeel: Jy oefen tot jy elke noot ken, dan vergeet jy wat jy geleer het, maak jou oë toe en speel.’
Kom ons begin met lot nommer een! ’n Kwaliteit Vleismerinoram, menere. Kyk net daai lekker kop aan hom. Dis ’n ram met ’n mooi, manlike bouvorm, menere. Kyk daai rug! Right, wie sê tienduisend?” Só begin Toyota se Jong Afslaerskompetisie. Deelnemers moet dieselfde ram opveil en word beoordeel volgens hul bedryfskennis, houding (selfvertroue, oogkontak en lyftaal) en praattegniek.
“Jy moet vloeiend, ritmies en duidelik praat,” sê die beoordelaar mnr. Appie Maritz, ’n afslaer van BKB. “Ons kyk ook hoe jy die dier voorstel, die gehoor se aandag hou en mense betrokke kry.
“Die jong manne is natuurlik ’n bietjie op hul senuwees. Ek verseker jou, ek kan my eerste veiling ook goed onthou. My been het geskud van senuweeagtigheid. Ek kon dit net nie stil kry nie.”
As jy egter deurdruk, sal jy nooit spyt wees nie, sê Appie. “Om ’n afslaer te wees, is die lekkerste werk ter wêreld. Daar is niks wat daarby kom nie.”
OP DIE ROSTRUM
Mnr. Danie Strauss, ’n vorige wenner van dié kompetisie, het ’n voorbeeldronde op die rostrum gedoen. Om destyds die praattegniek onder die knie te kry, het hy na ander afslaers en hul tegnieke geluister en met rukke en stote sy eie tegniek ingeoefen. “Ek ry taamlik baie rond en het elke telefoonpaal as ’n bod gebruik. Dis soos klavierspeel: Jy oefen tot jy elke noot ken, dan vergeet jy wat jy geleer het, maak jou oë toe en speel.
“Die moeilikste is om in jouself te glo en absolute beheer oor die rostrum te neem. Wanneer jy in die produk glo en só jou kopers oortuig, motiveer die veilingsatmosfeer sommer die kopers. Humor werk darem ook so dan en wan.
“As jong afslaer kan dit soms voel of jy nie soveel geleenthede kry nie, maar die feit dat ek onder begin het en trap vir trap klim, hou my optimisties, passievol en lewenslustig om bo uit te kom. Die enigste werk waar ’n mens bo begin, is as ’n grafgrawer.”
Vanjaar se streekwenner in die kategorie vir 19-30-jariges is mnr. JP Marais, wat op ’n plaas by Kookhuis in die Oos-Kaap grootgeword het. “Ek het vanaf ’n jong ouderdom van veilings gehou. Ek wou ook so vinnig praat en in beheer wees van ’n veiling.”
Die kompetisie op Sandringham was sy eerste keer op ’n rostrum. “Die stresvlakke was maar baie hoog!”
Die 15-jarige Hertie Lerm van die wildsplaas Lasarus naby Albertinia is al van kleins af gaande oor veilings. “Toe ek nege was, het ek veilings in ons sitkamer gehou waaraan die hele familie moes deelneem. Ek het my speelgoeddiere in bomas uitgepak, soos op ’n regte veiling.” Op twaalf het hy ’n kursus aan die Suid-Afrikaanse Afslaerskollege voltooi, en nadat hy drie jaar agtereenvolgens die nasionale junior kategorie gewen het, het hy vanjaar in die ouer kategorie meegeding, waar hy ’n tweede plek behaal het. Hy gaan goed voorbereid na elke veiling en dra ’n afslaershamer en aantekeningboek wat met volstruisleer oorgetrek is, saam. “’n Regte afslaer het altyd sy hamer reg en slaan die bod daarmee toe. Die volstruisleerboek het ek spesiaal laat maak. As iemand my iets oor ’n lot vertel, maak ek ’n aantekening. Dit alles verhoog die bod wat jy op die lot kry.
“As ek op die rostrum staan, is ek senuweeagtig, maar sodra ek begin, leef ek my passie uit en geniet ek dit baie. Eerlikheid en passie, asook kennis van die produk wat jy verkoop, is belangrik om vertroue by jou kopers in te win.”
Voorkoms tel ook. “’n Afslaer moet altyd netjies aangetrek wees. Jy gaan nooit op die rostrum met ’n kortbroek nie – dit is onprofessioneel.
“Kapt. Hedley Harris van die kollege het ons geleer dat selfs jou private lewe dit wat jy op die podium doen, beïnvloed, dus of mense jou gaan glo en respekteer. Jy moet daarom ’n onberispelike lewenstyl handhaaf.”
WAT IS VOLGENDE?
Hertie ontvang tuisonderrig en is reeds ’n wild-en-veeboer op Lasarus. Hy behartig liefdadigheidsveilings “oral waar mense my vra”.
“Ek skryf volgende jaar matriek en wil eendag vir een van die groot veilingshuise werk en later my eie afslaersonderneming begin.”
JP en Danie hoop ook om diep spore in die veilingsbedryf te trap. Danie vertel: “As jy die oud-Springbok Victor Matfield gevra het wat was sy beste wedstryd, was sy antwoord: ‘Die volgende wedstryd.’ Só is my uitkyk op my afslaerswerk. Deur aanhoudend te verbeter, na geleenthede te soek en nie te stagneer nie, sal die res volg.”