VERBRUIKER MOET DIE ‘KONING’ WEES
ALTESAME 1,2 miljoen huishoudings in Suid-Afrika besit vandag vee. ’n Styging van 19% word in die verbruik van beesvleis teen 2026 verwag. Boonop is die Suid-Afrikaanse veeverbeteringstelsel van wêreldgehalte en die land se veebedryf is aan die voorpunt met die gebruik van moderne tegnologie.
Dié gunstige prentjie is deur mnr. Gerhard Schutte, uitvoerende hoof van die Rooivleisprodusente-organisasie (RPO) op Agri-Expo Livestock op Sandringham buite Stellenbosch geskilder. Hy het gesê die Suid-Afrikaanse landbou se groeikoers is tans ’n uitstekende 33,6% en die rooivleisbedryf doen daarin mee. Elke jaar word meer vee in die land geslag as in die vorige jaar en die verkope van beesvleis beloop sowat R60 miljard. “Suid-Afrika is ook ’n netto-uitvoerder van beeste.”
Die onderskeie bedrae vir skaap- en bokvleis beloop R13,5 miljard en R4,4 miljard. Die hele rooivleisbedryf se omset beloop tans meer as R78 miljard.
Sowat 20% van die statutêre heffing wat boere betaal, word aan opkomende boere en projekte bestee. Hy het gesê die bevordering van dieregesondheid en uitvoer, asook verbruikersvertroue, moet voortdurend aandag kry. “Veral die deur na groter uitvoer moet ‘oopgeskop’ word.”
Schutte het gesê rooivleispryse is hoër as dié van vark- en hoendervleis. “Miskien moet daaraan gedink word om rooivleis as ’n heeltemal eksklusiewe produk in Suid-Afrika te bemark, maar dan moet die verbruiker tot elke prys as ‘die koning’ behandel word.”
Die plaaslike bedryf is in ’n gesonde posisie. Daar is tans 62 navorsingsprojekte oor rooivleis aan die gang. Wat wel aandag kort, is ’n nasionale naspeurbaarheidstelsel, asook beter roofdieren veediefstalbekamping.