OU VRIENDE EN NAMAKWA ‘EPIC’
Soos die meeste goeie stories het die storie van die skenking ’n lang aanloop, vertel me. Sulene Archer, ’n boervrou en entrepreneur wie se teetuin op die Kamiesberg en kontakte in die mieliewêreld haar gehelp het om haar gemeenskap te help.
Volgens mnr. Willie Zastron, provinsiale hoof by Absa Besigheidsbank, reël hulle die afgelope vier jaar ’n taai bergfietsrit in Namakwaland vir hul voorste boerekliënte wat dikwels nie ’n kans kry om die volle Cape Epic-fietstoer te ry nie. Op die
“Namakwa Epic” kry hulle ’n kans om ’n “mini-Cape Epic” te ry en op Namakwalandse gasvryheid getrakteer te word.
Vir Absa Besigheidsbank is dit ’n geleentheid om met groot kliënte te skakel, terwyl kliënte oor landbousake kan gesels.
Op die laaste aand hou hulle ’n wynveiling waarvan hulle die opbrengs aan ’n plaaslike, behoeftige organisasie skenk. Só het ’n instelling op Garies, die Doringrosiespeelskool op Nourivier en die Merwehofouetehuis op Kamieskroon al duisende rande ontvang.
Toe die fietsryers vanjaar nie ’n blommetjie
sien nie én die droogte in die veld ervaar, het hulle besluit om die opbrengs van die veiling aan die boere te skenk. Mnr. Balie Swart, voormalige Springbokstut, het vir die groep gesê: “Help die boere, hulle kry swaar.” Sulene sê sy en Berto (haar man) van die Subert-boerdery was in trane oor die vrygewigheid.
Willie sê hulle samel gewoonlik sowat R25 000 met die wynveiling in, maar hierdie keer het mense op wie ’n bod toegeslaan is, die wyn teruggegee om weer opgeveil te word. Altesaam R70 000 is op die ou end ingesamel.