FRAAIUITZICHT SE PLAAGBEHEERPROGRAM

In die winter gebruik mnr. Attie Grobler slegs biologiese produkte op die plaas Fraaiuitzicht se wortelaanplantings om die aalwurmprobleem in die grond die hoof te bied. Vier weke voor planttyd, wat gewoonlik van April tot Mei is, dien Attie 20 liter Mos-Nema per hektaar toe.

“Ons voeg 15 kg fulviensuur per ha en 30 kg humiensuur per ha daarby. Die resep word met planttyd herhaal en dan weer vier weke daarna. Hoe vroeër ons hierdie middels in die grond kan kry, hoe beter.

“Die middels word hoofsaaklik deur spuite toegedien, hoewel spilpunttoediening ook gedoen kan word. Dit is egter minder akkuraat. Die probleem is dat die produkte dikwels UV-gevoelig is en dus vroegaand toegedien moet word en dan ingewas moet word voor die son opkom,” sê Attie.

Mos-Nema is ’n kombinasie van organiese sure, Paecilomyces-swamme en mikrobes, sê mnr. Freddie Bredenhann, ’n onafhanklike konsultant.

“Dit is hoofsaaklik ’n grondverbeteraar wat die natuurlike balans in die grond herstel en is saamgestel vir gebruik by grond waar sekere grondgedraagde patogene organismes voorkom. Eerstens irriteer die organiese sure die selwande van die aalwurms, wat hulle dan aan infeksies blootstel. Die Paecilomyces-swamme val ook die aalwurms en hul eiers aan.

“Om die werking van Mos-Nema aan te help, dien ons ook Mos-Woema (reg. nr. B4882) teen 20 liter/ha toe om seker te maak daar is genoeg aminosure in die grond,” sê Freddie.