TOEGEPASTE DIERENAVORSING ‘BROODNODIG’ VIR ’N GESONDE BEDRYF
SEDERT die demokratisering van Suid-Afrika was daar ’n uittog van kundigheid. Talle landbou-wetenskaplikes wat vir die staat gewerk het, het hulle óf tot die private sektor gewend óf geëmigreer. In die proses het institusionele geheue en kennis verlore geraak, sê dr. Jean Rust, tesourier van die Oos-Kaapse tak van Suid-Afrikaanse Vereniging vir Veekunde (SAVVV). Hy was ook die hooforganiseerder van die vereniging se goue jubileumkongres wat onlangs in Port Elizabeth gehou is.
Die kongres is deur meer as 370 afgevaardigdes bygewoon en deur toonaangewende wetenskaplikes van Afrika en Amerika toegespreek. Rust het aan Landbouweekblad gesê hoewel daar met reg sedert 1994 meer aandag aan die ontwikkelende landbou gegee word, is dit jammer dat die kollig nie meer so skerp op die kommersiële landbou val nie.
“Laasgenoemde is deesdae uiters gesofistikeerd en van die wêreld se beste boere bevind hulle in Suid-Afrika. As jy nie inligting na hulle toe bring nie, gaan hulle dit elders haal.”
Hy sê in die graan- en veebedrywe word ál meer private navorsing gedoen en daar word in ’n mindere mate op departementele navorsing gesteun.
Rust sê ofskoon die SAVVV nie besluitnemingsmagte het nie, kan die vereniging wél aanbevelings aan tersiêre en navorsingsinstellings vir oorweging voorlê.
“Hoewel basiese navorsing noodsaaklik bly, moet dit ook toepaslik wees.
“By ’n universiteit kan jy nog wegkom met akademiese navorsing wat in ’n proefskrif geskryf en iewers geliasseer word. In die praktyk moet toegepaste navorsing egter binne ’n kwessie van drie tot vyf jaar in werking gestel kan word.”
Hy meen een van die brandpunte waarna dringend gekyk sal moet word, is die kwessie van klimaatsverandering.
“Ons praat baie oor wat en wie dit veroorsaak, maar nie genoeg oor hoe dit getakel gaan word en hoe diereproduksiemetodes aangepas moet word om die gevolge van klimaatsverandering die hoof te bied nie. Oor die volgende twee tot drie dekades sal die onderwerp nie vermy kan word nie.”