BRANDSTOFPRYSE STYG WEER
‘n Onaangename vroeë Kersverrassing wag begin Desember op verbruikers: Brandstofpryse gaan vir die vyfde maand agtereenvolgens styg.
Mnr. Dawie Maree, hoof van landbou-inligting en -bemarking by FNB, sê teen middel November was die onderverhaling op petrol en diesel onderskeidelik 74c per liter en 62c per liter. Die styging in die internasionale produkpryse, gekoppel aan die prys van ruolie, sowel as die verswakking van die rand was verant- woordelik vir hierdie onderverhaling.
“Volgens die syfers van die Sentrale Energiefonds was die onderverhaling op die produkpryskomponent 32c per liter tot 45c per liter. Die verswakking in die wisselkoers was verantwoordelik vir ’n onderverhaling van gemiddeld 29c per liter.
Die skerp styging in brandstofpryse is nie goeie nuus vir graanboere wat midde-in planttyd is nie. “Op die medium- en lang termyn gaan die kosteknyptang wat produsente ervaar, net vererger.”
Maree sê vir ander verbruikers is dit ook slegte nuus – veral op die vooraand van die feestyd en somervakansie. “Ongelukkig is brandstofkoste ’n nie-diskresionêre uitgawe. Dit beteken dat ongeag met hoeveel die prys styg, die verbruiker eenvoudig daarvoor moet betaal. Verbruikers sal beslis twee keer moet begin dink oor hul rygewoontes.”
Hy sê met die huidige onstuimige politieke situasie in die aanloop tot Desember se ANC-leierskapverkiesing kan verwag word dat die wisselkoers steeds wipplank sal ry.
“Die dreigende politieke geskil tussen Saoedi-Arabië en Iran kan ook opwaartse druk op die ruolieprys plaas. Albei dié faktore kan tot verdere stygings in plaaslike brandstofpryse vroeg volgende jaar bydra.