DIÉ WEEK IN DIE LANDBOU
SÓ HELP LANDBOU
“Suid-Afrika se ekonomie word deur drie probleme in die gesig gestaar – werkloosheid, swak groei en ongelykheid, en die landbou pak al drie aan,” was mnr. Nhlanhla Nene, voormalige Minister van Finansies, se boodskap aan die Afrika-landboubeleggingsindaba in Kaapstad. Hy sê dat die landbou se vermoë om die ekonomie uit ’n tegniese resessie te lig, soos wat in die derde kwartaal van 2017 en ook in 2014 gebeur het, volhoubaar is mits beleggings in die landbou uitgebrei kan word.
BRAAKGROND
Die Departement van Openbare Werke het in die Parlement onthul dat meer as 1,9 miljoen hektaar staatsgrond ongebruik lê. Dié eiendom was sedert 2014 onderhewig aan meer as R138 miljoen se eiendomsbelasting en is gewaardeer op R12 miljard. Die DA sê in ’n verklaring dié grond moet dringend geoudit word ten einde alternatiewe gebruike daarvoor te bepaal. Die party meen die grond moet vir laekostebehuising aangewend word. Andersins kan die staat dit verkoop of verhuur sodat geld wat vir belasting of onderhoud sou gaan, eerder vir dienslewering aangewend kan word.
SUIKERTAKS AL NADER
Skaars ’n week nadat die Parlement se portefeuljekomitee gedreig het om die produsente-organisasie Canegrowers se statutêre heffing af te vat tensy hy swart boere meer inspraak in die bedryf gee, het die Nasionale Vergadering dié bedryf nóg ’n terugslag toegedien deur in te stem dat versoete suikerdrankies met 2,1c vir elke gram suiker bo 4 gram per 100 ml belas word. Dit is gelyk aan sowat 11% as dit gemeet word aan die gewildste versoete drankies se suikerinhoud. Die suikerbedryf maak reeds kapsie teen dié belasting sedert mnr. Pravin Gordhan, die vorige Minister van Finansies, dit die eerste keer aangekondig het in sy 2016-begroting. Die wet word nou na die Nasionale Raad van Provinsies verwys, waar dit óf goedgekeur óf afgekeur kan word.
AFRIKANER-EENHEID
Namibië se Afrikanerbeestelers is nou weer onder die vlerk van die Afrikaner-beestelersgenootskap (ABTG) van Suid-Afrika in ’n poging om die gehalte van die nasionale kudde te verbeter. Die Namibiese telers het dié besluit geneem op ’n onlangse vergadering op Otjiwarongo van Namibiese telers met dr. Pieter de Kock, voorsitter van die ABTG. Mnr. Bernd Gaerdes, voorsitter van die Namibiese bestuur, sê die plan is om ’n elite-teelkudde te vestig met die toptien manlike en vroulike diere, aangevul met elite-teelmateriaal uit Suid-Afrika. Die ABTG gaan ook help met die vestiging en bemarking van Afrikaner-handelsmerkvleis, AfriBeef, in Namibië.
OMNIA SE WINS STYG
Die kunsmisvervaardiger Omnia verwag gesonde groei in sy inkomste vir die jaar tot 30 September 2017, met ’n styging van tussen 26,1% en 31,1% in die verdienste per aandeel, en ’n styging van tussen 28,8% en 33,8% in die wesensverdienste per aandeel teenoor die vorige jaar. Omnia sê hy verwag ’n verdienste van 414,78c tot 431,23c per aandeel en ’n wesensverdienste van tussen 412c en 428c per aandeel. Omnia sou na verwagting teen 28 November sy jaarresultate bekend gemaak het.
PIONEER IN PYN
Die genoteerde kosverwerker Pioneer Foods het mistroostige resultate bekend gemaak vir die jaar tot 31 Oktober. Sy bedryfswins het met 44% geval tot R1,2 miljard, en groepverdienste per aandeel met 57% tot R3,90 per aandeel, teenoor verlede jaar se R9,12 per aandeel.
MÉÉR CHINESE VRUGTE
China gaan na verwagting groter volumes appels, pere én tafeldruiwe lewer, volgens die Amerikaanse departement van landbou se nuutste vooruitskouing. Fresh Plaza berig China sal na verwagting 1% meer appels (44,5 miljoen ton), 2% meer pere (19 miljoen ton) en 4% meer tafeldruiwe (11,2 miljoen ton) lewer. Dit is ondanks kleiner oeste in die noordelike en oostelike produksiestreke weens hitte- en droogtetoestande. Die aangeplante hektare appels én pere in China begin daal ná amper ’n dekade van
uitbreiding.