TWEE MANNE MET ’N TOEKOMSBLIK
Adj.pres. Cyril Ramaphosa sien in sy toekomsblik dat daar ’n miljoen werksgeleenthede in die landbou geskep word. Dié toekomsblik grond hy op sy inkubasiesentrum vir klein en mediumgroot ondernemings waarin 1 237 ondernemings geskep is wat werk vir 10 527 mense geskep het onder die vaandel van die Cyril Ramaphosa-stigting.
As hy die werksaamhede van sy stigting kan uitbrei en 1 miljoen werksgeleenthede in die landbou kan skep, sal hy ’n nasionale held wees en sal Suid-Afrika so ver van rommelstatus wegbeweeg dat dit nooit weer ’n faktor sal wees nie. Mnr. Ramaphosa, laat dit asseblief nie net by praatjies bly nie. Skep asseblief die werk sodat die hele land daarby kan baat vind.
Ek weet nie of Ramaphosa bewus is van ’n ander man wat ook ’n toekomsblik vir die landbou het nie. Hy is die vakbondleier mnr. Zwelinzima Vavi. Sy blik is om die kommersiële boere een vir een by te kom oor die sogenaamde swak toestande vir werkers op plase, die uitbuiting van werkers en hongerlone. Hy vra ’n algemene verbod op uitsettings. Verder is sy toekomsblik dat alle plaaswerkers binne die afsienbare tyd ’n minumum loon van R8 400 ontvang.
Mnr. Vavi, jy dink sekerlik as jy dit gaan regkry, gaan jy die plaaswerkers en Suid-Afrika se held wees. Maar, soos die boere sê, enige ou kan bek maak, maar om dit waaroor jy bek maak, te kan doen, is ’n ander saak.
Hou op om oningeligte mense wat reeds swaar kry met jou opruiende toesprake op te sweep en onrealistiese verwagtings by hulle te probeer skep. Ek dink ek kom baie meer op plase as jy en ek weet hoe belangrik goeie en gelukkige werkers vir ons boere is. Ons boere is geen monsters nie. Verreweg die meeste is beskaafde mense wat Christelike norme handhaaf en hul werkers met agting en respek behandel en binne hul finansiële vermoëns vergoed.
Daar is wel die enkele uitsonderings en geen boer praat dit goed nie, maar by watter bevolkingsgroep in die land is daar nie die enkele uitsonderings wat hulle skuldig maak aan gruwelike wandade teenoor ander nie?
Mnr. Vavi, daar is geen voordeel vir jou of enigeen daarin om mense teenoor mekaar af te speel nie. Dit gaan nie Suid-Afrika ’n beter land maak nie.
Bring eerder mense bymekaar, begin met mekaar praat, soek mense se welwillendheid en beding saam oplossings en skep só ’n beter land vir almal. Dit is ’n feit soos ’n koei, solank mense soos u mense teen mekaar oprui, is die land gedoem. Geen rassegroep kan hier op sy eie voortbestaan nie. Ons almal het mekaar nodig. Net deur saamstaan en saamwerk, dissipline en agting vir mekaar is daar vir almal ’n toekoms in Suid-Afrika. PETRUS ROUX Villiersdorp