VEILIGHEID HOU NOOIT VAKANSIE
Die feestyd is ’n geleentheid vir misdaad, en geen plaasbewoner kan bekostig om te laat slaplê met gewone veiligheidsmaatreëls nie, waarsku mnr. Kobus Breytenbach, voorsitter van Agri SA se komitee vir landelike veiligheid. “In die feestyd kry plaasmense familie en vriende wat kom kuier vir Kersfees en dan is almal in ’n gemaksone. ’n Mens is nie oplettend vir vreemde voertuie wat op plaaspaaie ry nie.” sê hy.
Hy maan ook boere om bure en die plaaslike polisiekantoor in kennis te stel van hul afwesigheid sodat polisie en lede van die plaaswag die omgewing kan patrolleer.
Breytenbach herinner boere ook daaraan om veiligheidsmaatreëls, soos diefwering en veiligheidshekke, te tref, en nie kontant onverantwoordelik op plase te hanteer nie.
Hy benadruk ook weer die wenk dat boere ’n gelaaide selfoon in hul huise moet versteek vir moontlike krisisse.
“As jy iets vreemd buite hoor, moet liefs nie uitgaan nie. Aktiveer eerder die veiligheidstelsel sodat jou bure jou kan bystaan in die geval van ’n krisis. En as een van jou gaste in die aand dalk iets uit sy of haar voertuig wil gaan haal, vra of dit kan wag tot die volgende oggend of vergesel hom of haar na die motorhuis.”
Hy sê dit is ook raadsaam om ’n besoekersregister te hou vir plaaswerkers en -bewoners se besoekers, veral diegene wat by hulle sal oornag.
Vir só ’n register kan die besoeker se details, soos sy naam en van, identiteitsnommer, telefoonnommer en adres, gevra word.
“Dit sal die boer help met naspeurbaarheid, en help met toegangsbeheer, soos Agri SA se plaasprotokol vir toegang tot plase uitwys,” sê hy.
Die KwaZulu-Natalse departement van landbou en landelike ontwikkeling waarsku dat daar die afgelope weke ’n skielike toename in veediefstal voorkom en maan alle veeboere en huishoudings wat vee aanhou om bykomende veiligheidsmaatreëls in te span.