WOL SA KELDER NUWE FINANSIERINGSPLAN
DIE Nasionale Wolkwekersvereniging (NWKV) se voorstel dat die wolbedryf ondersoek instel na maniere om te verseker dat broodnodige dienste aan wolboere volhoubaar gefinansier word, is by die jongste vergadering van die Wolforum uitgestem.
Dié dienste sluit in skeeropleiding, navorsing oor roofdierbekamping en roofdier-monitering, wat uit die Woltrust gefinansier word, asook verspreiding van die organisasie se amptelike publikasie, Die Wolboer, aan almal wat by wol ’n belang het.
Die ondersoek sou net kon voortgaan indien daar konsensus op die forum was, maar Wol Suid-Afrika se twee verteenwoordigers het teen die voorstel gestem.
Bewerings het ná die vergadering op sosiale media die rondte gedoen dat die NWKV met dié versoek “verskuilde motiewe” gehad het. Mnr. Danie Schoeman, voorsitter van Wol Suid-Afrika, wou nie op dié beweringe kommentaar lewer nie, maar het erken dat sy organisasie teen die NWKV se voorstel gestem het.
LANG AANLOOP
Mnr. Guillau du Toit, voorsitter van die NWKV, het aan Landbouweekblad gesê die NWKV se bestuur bespreek reeds geruime tyd die volhoubaarheid van die finansiering van sekere noodsaaklike dienste uit die Woltrust.
“Ons standpunt is dat daar proaktief opgetree word, ingeval die dag aanbreek dat daar nie voldoende opbrengste uit die trustgeld is om vir bepaalde dienste te betaal nie.”
Hy sê daar is twee opsies om dienste te finansier as die Woltrust se opbrengste weens die swak ekonomie onder te veel druk kom. Die een is ’n statutêre heffing – wat nie die NWKV se nasionale bestuur se keuse is nie – óf ’n bedryfsbydrae, soos tans, waar 15c/ kg van alle wolboere verhaal word vir die plaaslike en internasionale bevordering van die vesel.
“Die NWKV se siening is dat indien die bedryfsbydrae met 7c/kg (22 sent/kg in totaal) verhoog en herstruktureer word, die voortbestaan van die betrokke dienste vir die toekoms verseker sal wees en daar steeds geld vir wolpromosie beskikbaar sal wees.
“Daar is verder besluit indien so ’n ondersoek gedoen word, daar vooraf met wolboere gekonsulteer sal word. Die beginsel is dat dit op almal wat wol lewer, van toepassings sal wees, en die inkomste slegs op voorafbepaalde projekte bestee sal word.”
KOPERS
Du Toit sê die NWKV se standpunt is aan die Suid-Afrikaanse Wol- en Bokhaarkopersvereniging (Sawamba) oorgedra. Dié
BEMARKING
organisasie het aangedui hy sal te vinde wees vir so ’n ondersoek, mits dit op die Wolforum bespreek en konsensus bereik word.
“Ons het Wol Suid-Afrika genader om voor die forum ’n gesprek te voer. Indien die voorstel aanvaar word, sal dit slegs sowat 0,3% van die SA skeerselwaarde beloop vergeleke met die 2,7% wat Australiese boere vrywillig betaal,” sê hy.
Du Toit sê die NWKV sal voortgaan om sy lede te konsulteer en ’n verdere gesprek met Wol Suid-Afrika aan te vra omdat hy meen dit ’n eerbare en deursigtige voorstel is om baie belangrike basiese dienste vir die toekoms te verseker wat tot voordeel van die bedryf, maar veral produsente, sal wees. —