GROEN PROPAGANDA KAN VIR BOERE PROBLEME SKEP
TEEN die huidige vlakke waarteen wol verhandel, kan ’n mate van weerstand in die tekstielbedryf te wagte wees as pryse verder sou styg. Die feit dat die vesel hom egter in ’n nismark bevind en wêreldwye produksie nie skerp toegeneem het nie, behoort die mark oor die mediumtermyn te ondersteun, sê mnr. Peter Ackroyd, voorsitter van die Internasionale Woltekstielorganisasie (IWTO)
Ackroyd het vroeg Desember die halfjaarlikse byeenkoms van die IWTO in Port Elizabeth gelei. Hy sê ondanks die feit dat wol slegs 1,2% van wêreldveselverbruik verteenwoordig, dit ’n dominante plek in die luukse end van die mark beklee.
“Dit is egter ook dié verbruikers wat baie bedag op die omgewing, volhoubaarheid en dieresorg is. Groenes het die afgelope paar jaar uit hul pad gegaan om wol af te kraak omdat sommige meen dit is onmenslik dat skape geskeer en Mules se operasie (’n Australiese praktyk om brommeraanvalle te keer) toegepas word. “In New York en ander wêreldstede is daar reuse-advertensieborde op strategiese plekke, soos by lughawens en op busse, waarin die verbruik van wol afgekeur word,” sê hy, en voeg by omdat baie mode-ontwerpers en afdelingswinkels hulle graag aan die kant van omgewingsbewustes skaar, sulke veldtogte ’n bedreiging vir wol inhou.
Voorts maak vervaardigers van poliëster (wat uit olie vervaardig word), ook groot geldelike bydraes om die beeld van wol in besonder af te takel.
“Daar word nie in ag geneem dat die koolstofspoor van wol baie kleiner is wanneer die lang mode-raklewe daarvan in ag geneem word en dit ook nie so dikwels as mensgemaakte vesels gewas hoef te word nie.”
—
Hou komende uitgawes dop vir nog beriggewing oor die IWTO-vergadering.