FOSKOR VERHOOG SY PRYSE ONDANKS HOFBEVEL

OMNIA, ’n verskaffer van chemiese produkte aan onder meer die landbou, vra in ’n dringende hofaansoek in die Hooggeregshof in Pretoria dat Foskor, die enigste verskaffer van fosforsuur in die land, en sy direkteure aan minagting van die hof skuldig bevind word.

Omnia sê in ’n verklaring dit volg nadat Foskor ’n bevel van die Mededingingstribunaal oor die prys van fosforsuur verontagsaam het.

Die tribunaal het in 2010 bevind dat Foskor, teenstrydig met die Mededingingswet, buitensporige pryse gevra het.

Die tribunaal het beveel dat Foskor nie meer as die vryaanboordRichardsbaaiprys vir fosforsuur mag vra nie.

Omnia sê Foskor het egter sedert middel 2014 ’n hoër prys begin vra – hoër as die internasionale prys. Omnia het die Hooggeregshof toe gevra om die tribunaal se bevel af te dwing en die hof het in Oktober 2015 in Omnia se guns bevind.

Foskor het in Maart 2016 geappelleer, maar die appèl is op 6 November vanjaar deur ’n volbank regters met koste van die hand gewys.

Omnia verkry tans al sy fosforsuur van Foskor, wie se hoofaandeelhouer die Nywerheidontwikkelingskorporasie (NOK) is.

Omnia sê Foskor beheer ook die enigste invoergerief, wat by Richardsbaai is.

WEIER OM TE VERSKAF

Volgens Omnia dring Foskor daarop aan dat hy nie fosforsuur aan Omnia sal verskaf as Omnia sy regte wil voorbehou wanneer Mnr. Adriaan de Lange

hy Foskor se vereiste hoër prys betaal, of as Omnia die hoër prys onder protes betaal nie.

Foskor dring volgens Omnia ook daarop aan dat plaaslike kliënte briewe teken waarin hulle tot dié voorwaardes instem en het voorsiening van fosforsuur gestaak aan dié plaaslike kliënte wat nie teken nie.

“Foskor het doelbewus en onwettig die bevel van die Hooggeregshof verontagsaam, tot die nadeel van die land en sy mense,” sê mnr. Adriaan de Lange, uitvoerende hoof van Omnia.

“Omnia sit die saak in die howe voort om te verseker dat die Hooggeregshofbevel nagekom word en Foskor se benadering onmiddellik gestaak word.

“Foskor se optrede in dié kritieke planttyd, ná die eerste somerreën, stel die voedselvoorsieningsketting van SuidAfrika in gevaar, en kan net as onaanvaarbaar en hoogs onverantwoordelik beskou word.

“Dit is redelik buitengewoon dat Foskor weier om dié noodsaaklike produk in die hoofgroeitydperk vir die landbou aan plaaslike kunsmisprodusente en dierevoerverskaffers te voorsien,” sê De Lange

Omnia sê SuidAfrikaanse boere maak op Foskor staat as ’n plaaslike bron van ’n noodsaaklike voedingstof.

Plaaslike kunsmisprodusente en dierevoerverskaffers het fosforsuur en afgeleide produkte as onverwerkte materiale nodig.

—