KLEINSTE OES SEDERT 2005 OP PAD
VOLGENS ’n opname deur die SuidAfrikaanse Wynbedryfinligting en stelsels (Sawis) gaan SuidAfrika se druiweoes volgende jaar heelwat kleiner wees as vanjaar. “Dit kan selfs die kleinste oes sedert 2005 wees,” lui ’n verklaring van dié organisasie.
Sawis wou nie bekend maak hoeveel ligter hy die oes skat nie. In 2005 het die oes 1 157 631 ton beloop. Danksy ’n groter vraag en ’n kleiner internasionale oes kan wêreldwye tekorte in sekere kategorieë ontstaan, sê mnr. Rico Basson, VinPro se besturende direkteur.
Mnr. Stephen Rannekleiv, ’n strateeg by die internasionale landboubank Rabobank, sê daar gaan volgende jaar wêreldwyd minstens 20 miljoen hektoliter wyn minder beskikbaar wees as in die begin van die jaar. Dit kom neer op sowat 8% van die wêreldwye wynverbruik.
DRIEJAAR-DROOGTE
Dit is die derde jaar agtereenvolgens wat die droogte die grootte van die oes knou.
“Die meeste van die bedryf se groot besproeiingsdamme is in dié stadium 30% tot 40% vol. Dit beteken wyndruifprodusente se watervoorraad is met 40% tot 60% verminder. Hulle kan dus nie in die wingerde se volle waterbehoeftes voorsien nie,” sê mnr. Francois Viljoen, VinPro se konsultasiediensbestuurder.
“Die lae damvlakke en ’n onvoldoende watervoorraad sal waarskynlik die grootste bepaler van ’n kleiner oes in 2018 wees. Goeie, gereelde reënbuie in Desember en Januarie kan natuurlik groot verligting bring en die
vooruitsig nog verander.”
Wynboere in die Olifantsrivierwynstreek sukkel veral om staande te bly. Hulle kry minder as 25% van hul gewone waterkwota uit die Clanwilliamdam. ’n Groot daling in die oes word dus daar verwag.
Viljoen sê die gereelde reënbuie in Oktober en November, asook koeler weerstoestande tot einde November, het darem verligting gebring. Daarom vertoon die wingerde tans nog goed.
“Geen noemenswaardige swamsiektes of plae het tot dusver voorgekom nie,” sê hy
Die Oranjerivierstreek is die enigste wat nie watertekorte ondervind nie.
MINDER WINGERD
SuidAfrikaanse wynboere kap sedert 2007 meer wingerde uit as wat hulle aanplant. Die afgelope twee jaar het dié neiging versnel.
“In 2016 was die totale wingerdstand 95 775 ha teenoor 100 568 ha in 2011 – ’n 5%daling oor die afgelope vyf jaar,” sê Basson.
Hy voeg by dat die kleiner oes ook tot ’n afname in seisoenale werkgeleenthede gaan lei.
“Dit sal ’n wesenlike invloed op die sosiaalekonomiese welvaart van wynbedryfgemeenskappe hê. Die Olifantsrivierstreek gaan waarskynlik die ergste daardeur geraak word.”
SuidAfrika is die negende grootste wyndruifprodusent ter wêreld en dra 4% tot wêreldwye produksie by. Die bedryf voer 440 miljoen liter wyn uit en verkoop 400 miljoen liter plaaslik.
—