SOMERGESAAIDES | Die uurglas loop leeg
“Dis nie goed vir ’n ou se senuwees dié tyd van die jaar nie,” sê mnr. Gys Olivier, ’n saaiboer van Hertzogville in die Wes-Vrystaat, oor die wisselvallige weer wat al die hele planttyd heers.
By Viljoenskroon het sommige boere se reënmeters al oorgeloop, terwyl ander boere tussen Parys en Potchefstroom sê hul beeste trek swaar weens besonder nat toestande.
Olivier sê hy het nog nie voldoende reën gehad om te kan plant nie. In die eerste week van Desember het hy maar 7 mm gehad, maar elders in sy distrik het daar al 30 mm geval en was die trekkers aan die gang.
Olivier sê hulle hou wel moed. Die situasie beïnvloed nie net boere se vermoë om binne die optimale planttyd te kan plant nie, maar met die langer wag moet hulle gereeld hul “resep” ten opsigte van onkruidbekamping en primêre bewerkings aanpas. “Die laaste paar jaar het ons tot in Januarie geplant en dit het ons gelukkig nog nie geknou nie.”
TE NAT OF TE DROOG
Intussen sê mnr. Jaco Minnaar, voorsitter van Graan SA, sommige boere se landerye is te nat om te kan plant, terwyl hulle elders ook nie kan plant nie aangesien hul grond te droog is. Sy grond in die distrik Hennenman is byvoorbeeld te nat om te kan plant, terwyl hy nog wag op reën op sy plaas naby Bothaville.
Mnr. Naudé Pienaar, assistent-hoofbestuurder van Agri Noordwes, sê boere in die westelike en oostelike dele van dié provinsie het teen druktyd al goeie reën gehad.
“Dis in die sentrale dele, soos by Mahikeng, Zeerust en Swartruggens, waar dit nog baie droog is. Boere by Lichtenburg en Potchefstroom het al goeie reën gehad, en by Bray en Vorstershoop het boere al 40-46 mm gemeet.”
SONNEBLOMME
Oor die moontlikheid dat boere eerder sonneblomme as mielies gaan aanplant, sê Minnaar daar is nog nie ’n wesenlike skuif onder boere om sonneblomme aan te plant weens die laat reën nie. “Hoe langer die reën wegbly, hoe sterker gaan boere dit oorweeg om sonneblomme aan te plant.”
Minnaar sê daar bestaan nie groot probleme met die beskikbaarheid van sonneblomsaad nie, hoewel sommige kultivars dalk later nie geredelik beskikbaar sal wees sou die vraag toeneem nie.